നഷ്ടപ്പെടും മുൻപേ...

മൊബൈൽ ഫോൺ നഷ്ടപ്പെട്ടാൽ സ്മാർട്ടായി കണ്ടുപിടിക്കാനുള്ള വഴികൾ അറിഞ്ഞോളൂ...

- രതീഷ് ആർ. മേനോൻ ടെക്, സോഷ്യൽ മീഡിയ വിദഗ്ധൻ

കള്ളൻ അടിച്ചുമാറ്റി കൊണ്ടുപോയ മൊബൈൽ ഫോൺ സ്വയം കണ്ടുപിടിച്ച് മിടുക്കനെ കുറിച്ചുള്ള വാർത്ത ഈയിടെ പത്രത്തിൽ വായിച്ചു കാണുമല്ലോ. നഷ്ടപ്പെട്ട സ്വന്തം ഫോണിനെ കുറിച്ചോർത്തു ചിലരെങ്കിലും അപ്പോൾ നെടുവീർപ്പിട്ടു കാണും. നമുക്കെന്താ ദാസാ ഈ ബുദ്ധി നേരത്തേ തോന്നാത്തതെന്നു ചോദിച്ചു സമയം കളയേണ്ട. ഈ കാര്യങ്ങൾ ശ്രദ്ധിക്കൂ.

ഫോൺ പോയാലോ

സൈബർ സെല്ലിൽ പരാതി കൊടുത്താൽ ഫോൺ തിരികെ കിട്ടുമെന്നാണ് മിക്കവരുടെയും പ്രതീക്ഷ. ആ പ്രതീക്ഷയ്ക്ക് എന്തെങ്കിലും വകയുണ്ടാകണമെങ്കിൽ ചില കാര്യങ്ങൾ മുൻപേ ചെയ്തു വയ്ക്കണം. ഫോൺ വാങ്ങിയാലുടൻ ഐഎം ഇഐ നമ്പർ കുറിച്ചു വയ്ക്കണം. ഫോൺ നഷ്ടപ്പെട്ടാൽ പരാതി നൽകാൻ ഇത് ആവശ്യമാണ്. *#06# എന്നു ഡയൽ ചെയ്താൽ ഐഎംഇഐ നമ്പർ അറിയാനാകും.