தெய்வீக வாத்தியம் மிருதங்கம்!

தெய்வீக வாத்தியக் கருவியாகிய மிருதங்கத்தை அற்புதமாக கையாள்பவரும், சிறந்த குருக்களின் வழி காட்டுதலின் கீழ் செயல்பட்டவரும், ஆல் இந்தியா ரேடியோவின் ஏ - டாப் கிரேட் கலைஞரும், இசைத்துறையில் மிகவும் ஈடுபாடு கொண்டு பெரும் சேவை செய்து வருபவரும், கர்நாடக இசையில், தாள வாத்தியம் தொடர்பான தலைப்புகளில் கட்டுரைகளை வெளியிட்டவரும், சுஸ்வரலாயா இசைக் கல்லூரியின் நிறுவனர், அறங்காவலர் மற்றும் முதல்வராக விளங்குபவரும், உலகம் முழுவதிலும் இசை நிகழ்ச்சிகளை அமைதியாக நடத்தி வருபவருமாகிய மிருதங்க இசைக் கலைஞர் வித்வான் எச்.எஸ்.சுதீந்திரா, பெண்மணிக்காக அளித்த பேட்டி:

- மிருதங்க இசைக்கலைஞர் எச்.எஸ். சுதீந்திரா

தங்களைப் பற்றியும், குடும்பம் குறித்தும்..?

கர்நாடக சங்கீதத்தில் மிகவும் ஈடுபாடு கொண்ட குடும்பத்தில் பிறந்தது, நான் செய்த பாக்கியம் எனலாம். தந்தை எச்.சீனிவாச ராவ்; தாயார் எஸ்.இந்திரா. தந்தை வழி தாத்தா காலஞ்சென்ற அனுமந்தராவ் குபேர், வயலின் வாசிப்பது வழக்கம். அவர் வாசித்த வயலினைப் பாதுகாத்து வைத்துள்ளோம். தந்தை வழி பாட்டி சாரதா ஷ்யாமாராவ், சங்கீதக் கலைஞர் திட்டே கிருஷ்ண ஐயங்காரின் சிஷ்யையாக விளங்கியவர். தாயார் லக்ஷ்மண் சாஸ்திரியிடம் கர்நாடக இசை கற்றவர். வீட்டில் எப்போதும் இசை ஒலித்துக் கொண்டேயிருக்கும்.

கற்றுக் கொடுத்த குருக்களின் விபரங்கள்..?

இரண்டு பெரிய குருக்களின் கீழ் பயிற்சி பெற்றது இறையருளே எனலாம். மரியாதைக்குரிய இருவரும் நிகழ்வுகளை நடத்துவதோடு, கற்றுக் கொடுக்கும் ஆசிரியர்களாகவும் விளங்கினார்கள்.

வித்வான் எம்.வாசுதேவ ராவிடம், இசை கலைஞர் சீதாலெட்சுமி வெங்கடேசன் என்னை அறிமுகப்படுத்தி வைத்தார். மூன்று வருடங்கள் வாசுதேவ சாரிடம் கடம் பயின்றபின், அநேக வாத்தியக் கச்சேரிகள் நடக்குமிடங்களுக்கு என்னை அழைத்துச் சென்று ஊக்கமூட்டுவார். இவருடைய அன்பையும் பாசத்தையும் அளவிடமுடியாது.