ശിവതാണ്ഡവവും ചിദംബര രഹസ്യവും

നടരാജനൃത്തത്തെ "പ്രാപഞ്ചിക നൃത്തം' എന്നാണ് പടിഞ്ഞാറൻ ശാസ്ത്രഗവേഷകർ വിശേഷിപ്പിക്കുന്നത്

- എ.എം

ദേവാധിദേവൻ മഹാദേവൻ മഹാനർത്തകൻ കൂടിയാണ്. ഭഗ വാന്റെ നൃത്തം താണ്ഡവം എന്നാണ് അറിയപ്പെടുന്നത്. ഇന്നും ലോകത്തിന്റെ പല കോണുകളിലും ശിവതാണ്ഡവത്തെക്കുറിച്ച് ഗവേഷണങ്ങൾ നടക്കുന്നുണ്ട് എന്നാണ് പറയപ്പെടു ന്നത്. അതേസമയം, ശിവതാണ്ഡവത്തെക്കുറിച്ച് ആധികാരികമായ സമ്പൂർണ്ണരേഖകളൊന്നും ഇതു വരെ രചിക്കപ്പെട്ടിട്ടില്ല എന്നും ഒരു ശ്രുതിയുണ്ട്. എന്നാൽ ഇതുമായി ബന്ധപ്പെട്ട വിശ്വാസപ്രമാണങ്ങൾ ഏറെയാണ്.

108 നൃത്തങ്ങൾ ശിവനിൽ നിന്ന് ആവിർഭവിച്ചു എന്നാണ് വിശ്വാസം. ജീവജാലങ്ങളെ ദുഃഖത്തിൽ നിന്ന് മോചിപ്പിക്കാനും വിനോദത്തിനും വേണ്ടി നിത്യവും സായംസന്ധ്യാനേരം ശിവൻ കൈലാസത്തിൽ നൃത്തം ചെയ്യുന്നു. അത് താണ്ഡവ നൃത്തമാണ്. പാർവ്വതിദേവി ലാസ്യനടനത്തിലൂടെ ഭഗവാനെ പ്രോത്സാഹിപ്പിക്കുന്നുവെന്നും വിശ്വാസമുണ്ട്. വാദ്യോപകരണമായ ഡമരു മുകളിലെ വലതുകയ്യിലും തീ മുകളിലെ ഇടതുകയ്യിലും പിടിക്കും. താഴത്തെ വലതുകൈ കൊണ്ട് അഭയമുദ്രയും താഴത്തെ ഇടതുകൈ കൊണ്ട് ഉയർത്തിയ ഇടതുകാലിനെ ചൂണ്ടിയിരിക്കും.