ഓങ്കാര പൊരുൾ തേടി

കണ്ണൂരിൽ നിന്നും കൂത്തുപറമ്പിലേക്കുള്ള വഴിയിലാണ് പെരളശ്ശേരി സുബ്രഹ്മണ്യസ്വാമിക്ഷേത്രം സ്ഥിതിചെയ്യുന്നത്. ഈ സുബ്രഹ്മണ്യക്ഷേത്ര വുമായി ബന്ധപ്പെട്ട് ഈ ദേശത്തിന് രണ്ടുപേരുകളുണ്ട്. ഒന്ന്, പെരളശ്ശേരി എന്നാണെങ്കിൽ മകരി എന്നാണ് മറ്റൊരു പേര്.

- ജി. കൃഷ്ണൻ

ത്രേതായുഗത്തിൽ ശ്രീരാമനാണ് ഇവിടെ സുബ്രഹ്മണ്യ പ്രതിഷ്ഠ നടത്തിയതെന്ന് ഐതിഹ്യത്തിൽ പ്രതിപാദിക്കുന്നു. വനവാസക്കാലത്ത് രാവണൻ സീതയെ അപഹരിച്ചപ്പോൾ ശ്രീരാമചന്ദ്രൻ ലക്ഷ്മ - ഹനുമാൻ സമേതനായി തെക്കേദിശയിലേക്ക് യാത്ര പുറപ്പെട്ടു. ആ യാത്രാമദ്ധ്യേ അയ്യപ്പൻകാവിലെത്തി, ക്ഷേത്രം ദർശിച്ച ശ്രീരാമന് അവിടെ സുബ്രഹ്മണ്യ സാന്നിദ്ധ്യം അനുഭവപ്പെടുകയും ആ ചരിത്രം ഹനുമാനോടും ലക്ഷ്മണനോടുമായി പറഞ്ഞു കൊടുക്കുകയും ചെയ്തു.

ഒരിക്കൽ ബാലസുബ്രഹ്മണ്യൻ ബ്രഹ്മാവിനോട് ഓംകാരത്തിന്റെ പൊരുൾ എന്താണെന്ന് ചോദിക്കുകയുണ്ടായി. എന്നാൽ, വേദവിധാതാവായ ബ്രഹ്മാവിന് അതിന്റെ അർത്ഥം യഥാവിധി പറഞ്ഞു കൊടുക്കാനായില്ല. ദേഷ്യം വന്ന സുബ്രഹ്മണ്യൻ ബ്രഹ്മാവിനെ തടവിലിടുവാൻ വീര ബാഹുവിനോട് കൽപ്പിച്ചു. പ്രപഞ്ചസ്രഷ്ടാവായ ബ്രഹ്മാവ് തടവിലായതോടെ പ്രപഞ്ചത്തിൽ സൃഷ്ടി നിലച്ചു. ദേവകൾ പരമേശ്വ രനെക്കണ്ട് ഇതിനൊരു പ്രതിവിധി കാണണമെന്ന് അപേക്ഷിക്കുകയുണ്ടായി.

പരമശിവന്റെ നിർദ്ദേശമനുസരിച്ച് സുബ്രഹ്മണ്യൻ ബ്രഹ്മാവിനെ മോചിപ്പിച്ചു. പക്ഷേ.., പിന്നീട് അദ്ദേഹത്തിന് പ്രായശ്ചിത്തം ചെയ്യേണ്ടിവന്നു. കുറച്ചു കാലം ഏകാന്തതയിൽ അജ്ഞാതവാസം നയിക്കാനായിരുന്നു ദേവഗുരുവിന്റെ നിർദ്ദേശം. അതനുസരിച്ച് ഇവിടെ അയ്യപ്പൻ കാവ് സ്ഥിതി ചെയ്തിരുന്ന സ്ഥലത്തെ ഒരു പൊട്ടക്കിണറ്റിൽ ഏകാന്തവാസം നയിച്ചു. വെയിലും മഞ്ഞും മഴയും ഏൽക്കാതെ ഒരു സർപ്പം ഫണം കുടയാക്കിപ്പിടിച്ച് അദ്ദേഹത്തെ കാത്തുപോന്നു. അതുകൊണ്ടു തന്നെ ഇവിടെ സുബ്രഹ്മണ്യസ്വാമിക്ക് സുപ്രധാനമായ സ്ഥാനം നൽകി പൂജിക്കണമെന്ന് ശ്രീരാമൻ പറഞ്ഞു.