காலச் சக்கரத்தின் சுழற்சிக்கேற்ப அடியெடுக்கும் வீரகேசரி

இலங்கையில் தமிழ் பேசும் மக்களுக்கான ஊடக முயற்சிகள் பத்தொன்பதாம் நூற்றாண்டின் பின்னரைப் பகுதியில் தோற்றம் பெற்றன. பெரும்பாலும் இவை மதத்தைப் பரப்பும் நோக்கில் அமைந்திருந்தன. காலப்போக்கில் கல்வி மறுமலர்ச்சி, சமூக விழிப்புணர்வு, ஒடுக்குமுறைகளுக்கெதிரான போராட்டங்கள் என அவை வளம் பெற்றன. இப்பின்னணியில் ஒரு பரந்த தமிழ் சமூக அரசியல் குரலுக்கான தேவையும் உணரப்பட்டது.

- இஸட். ஏ. ஸன்ஹிர், உதவிக் கல்விப் பணிப்பாளர், (ஓய்வு நிலை)

வீரகேசரியும் தோற்றம் பெற்றது.

இன்று, வீரகேசரி ஒன்பதரைத் தசாப்தங்களைத் தாண்டிப் பயணிக்கத் தொடங்கும் தினமென்பதையிட்டு அதன் வாசகர்கள் மட்டுமன்றி தமிழ் கூறும் முழு உலகும் மகிழ்வெய்தும் என்பதை ஐயம் திரிபுறக் கூற முடியாது.

இப்பத்திரிகையானது இலங்கைப் பொருளாதாரத்தின் முதுகெலும்பாக இருந்து, வியர்வையை உரமாக்கி உழைத்து, ஓடாய்த் தேய்ந்து போன சமூகமொன்றின் உரிமைக் குரலாக, மலையகத்தை மையப்படுத்தி அது ஆரம்பிக்கப்பட்டபோதும் காலப்போக்கில் இலங்கை வாழ் தமிழர்களின் வாழ்வியலின் அனைத்துத் துறைகளிலும் அகலக் கால்பதித்து அடியெடுத்து வைத்து வீறுநடைபோடும் சிம்மமாகக் குரல் கொடுத்து வருகின்றது.

வீரகேசரி நாளிதழை தென் தமிழ்நாட்டின், ஆவணிப்பட்டி பெ. பெரி. சுப்பிரமணியம் செட்டியார், கொழும்பு செட்டியார் தெருவில் 06.08.1930 புதன் அன்று எட்டுப்பதிப் பக்கங்களுடன் ஆரம்பித்து வைத்தார்.

இதழின் முதல் செய்தித் தலைப்பு ‘இன்றைய புதினங்கள்’ என்பதாகும். அன்றைய புதினம், இன்று வரலாறாகி நிற்கின்றது.

முதற் பக்கத்தின் இறுதி வசனம் ‘வீட்டிற் கழகு வீரகேசரியை வரவேற்றல்’ என்பதாகும்.

வீர நாமம் கொண்ட வீரகேசரியை வீடுகளில் வரவேற்றதால் தான், கையச்சுக் கோர்ப்பில் உருவாகி, ஐந்து சதத்துக்கு விற்பதற்கென ஆரம்பிக்கப்பட்ட, எட்டு பக்கங்களை கொண்ட இப்பத்திரிகை இன்று எம்மத்தியில் தனியான இடத்தைப் பிடித்துள்ளது.

காலப்போக்கில் கணினிமயமாக்கப்பட்டு, இன்றைய எண்ணிம உலகில் செய்திகளுடன் கருத்துக்களையும், ஆய்வுகளையும், பொழுதுபோக்கு அம்சங்களையும் தாங்கி மின்பத்திரிகையாகவும் 2001 முதல் உலா வருகின்றது.