புதிய கல்விச் சீர்த்திருத்தம் எதனைச் சாதிக்கப் போகிறது?

2026 ஆம் ஆண்டு ஆரம்பிக்க திட்டமிடப்பட்டுள்ள புதிய கல்வி சீர்திருத்தம் சமூகத்தில் அதிக கவனத்தைப் பெற்றுள்ளதுடன் அதுபற்றிய ஒரு கருத்தாடலும் நடைபெற்று வருகிறது.

- 

*பாடசாலையை விட்டு வெளியேறும் அனைத்து பிள்ளைகளுக்கும் NVQ சான்றிதழ்.

*பாடசாலைக் கல்வியின் பின்னர் தொழிலொன்றைச் செய்ய அல்லது பட்டப்படிப்பை தொடர்வதற்கான வாய்ப்பு

*க.பொ.த சாதாரண தரத்துக்கான பாடங்களின் எண்ணிக்கை 07 ஆகக் குறைக்கப்படும். டிஜிட்டல் மயமாக்கல் மூலம் அனைத்து பிள்ளைகளுக்கும் கல்விக்கான வாய்ப்புகளை வழங்குதல்.

*6 முதல் 11 ஆம் வகுப்பு வரை வரலாறு, அழகியல் மற்றும் தொழிற்கல்வியை கற்பது கட்டாயமானதாகும்.

*மொத்த பாடசாலைக் கல்வியினதும் முன்னேற்றத்தைக் கண்காணிக்க ஒரு தனிப் பிரிவு. ஒவ்வொரு பிள்ளை தொடர்பிலும் விசேட கவனம் செலுத்துவதற்கான ஒரு முறைமை.

இலங்கையர்களான எமக்கு சீர்திருத்தங்கள் புதிதல்ல. மஹிந்த தேரரின் வருகையிலிருந்தே, ஒவ்வொரு துறையிலும் பல்வேறு சீர்திருத்தங்கள் ஏதோ ஓரளவில் நடந்துள்ளன. போர்த்துக்கேயர், ஒல்லாந்தர் மற்றும் ஆங்கிலேய காலனித்துவ காலங்களை ஆய்வு செய்கின்ற போது இலங்கையின் கல்வித் துறையிலும் பல்வேறு சீர்திருத்தங்கள் இடம்பெற்றுள்ளமை தெளிவாகும். இந்த சீர்திருத்தங்கள் அனைத்தும் மக்களின் அல்லது நாட்டின் அபிவிருத்தியை மையமாகக் கொண்டல்லாது, சமயப் பிரசாரத்தை மையமாகக் கொண்டு மேற்கொள்ளப்பட்டுள்ளமை எடுத்த எடுப்பிலேயே விளங்கிக்கொள்ள முடியுமான விடயமாகும்.

இலங்கையில் கல்வித்துறையில் மேற்கொள்ளப்பட்ட மிக முக்கியமான சீர்திருத்தம், சி. டபிள்யூ. டபிள்யூ. கன்னங்கரா கல்வி அமைச்சராக இருந்தபோது மேற்கொள்ளப்பட்ட கல்விச் சீர்திருத்தமாகும். இது கல்வித் துறையில் மிகப்பெரிய விழிப்புணர்வை ஏற்படுத்தியதுடன், இதன் மிகவும் குறிப்பிடத்தக்க விளைவாக இலவசக் கல்வி மூலம் நாட்டில் இலட்சக்கணக்கான பிள்ளைகளுக்கு கல்வி வாய்ப்புகள் உருவாக்கப்பட்டமையாகும்.

அதைத் தொடர்ந்து, நாட்டை ஆண்ட பல் வேறு அரசாங்கங்களின் கீழ் நியமிக்கப்பட்ட கல்விக்குப் பொறுப்பான அமைச்சர்கள் கல்விச் சீர்திருத்தங்களைச் செயற்படுத்த பல் வேறு முயற்சிகளை மேற்கொண்டனர். அந்த சீர்திருத்தங்கள் இந்த நாட்டில் கல்வியை ஓரளவு நேர்மறையான நிலைக்குக் கொண்டுவர பங்களித்திருந்தாலும், சமூக அழுத்தங்களை எதிர்கொண்டு அவற்றைக் கிடப்பில் போட்ட சந்தர்ப்பங்களும் இல்லாமலில்லை.