யாழ்ப்பாணப் பண்பாடு: மறந்தவையும் மறைந்தவையும்

போக்குவரத்து பண்பாட்டுக் கூறுகளில் ஒன்றாக அமையும் போக்குவரத்துச் சாதனங்களும், பாதைகள், தெருக்களும் பொருள்சார் பண்பாட்டின் பாற்பட்டவையே எனலாம்.

- 

ஒரு பிரதேசத்தின் அபிவிருத்தியில் போக்குவரத்துக்கு மிகவும் முக்கியத்துவம் உண்டு. இந்த வகையிலே யாழ்ப்பாணக் குடாநாட்டின் போக்குவரத்துச் சாதனங்கள் பற்றியும் போக்குவரத்துப் பாதைகள் பற்றியும் அவற்றோடொட்டிய பண்பாட்டு அம்சங்கள் பற்றியும் நோக்குவது மிகவும் முக்கியமானது.

யாழ்ப்பாணக் குடாநாட்டின் போக்குவரத்துச் சாதனங்களாக மாட்டு வண்டி, குதிரை வண்டி, றிக்ஷோ, வள்ளம், தோணி(வத்தை) முதலியவற்றைத் தொடர்ந்து மோட்டார் வண்டி, புகைவண்டி ஆகியன பயன்படுத்தப்பட்டன. கால்நடையாகப், பாதசாரிகளாகப் பிரயாணம் செய்யும் வழக்கமே ஆரம்பத்தில் பெருவழக்காக இருந்தது. கால்நடையாகப் பயணம் செய்பவர்கள் சுமந்துவரும் சுமைகளை இறக்கி வைத்து இளைப்பாற வீதியோரங்களில் சுமைதாங்கியும் மடங்களும் அமைக்கப்பட்டிருந்தன. பாதசாரிகள் இளைப்பாறுவதற்காக நிழல்தரு மரங்களும் வீதியோரங்களில் வளர்க்கப்பட்டிருந்தன.

சுமை தாங்கியுடன் கிணறு அல்லது கேணி, குளம் என்பனவும் அமைந்திருக்கும். வழிப்போக்கர்கள் மாத்திரமன்றி மாட்டு வண்டியில் பயணிப்போரும் இவ்விடங்களிலேயே மாட்டை அவிழ்த்துக்கட்டி நீர் பருக விட்டு ஆறிச் செல்வது வழக்கம். இவ்விடங்களில் வண்டில் மாடுகளும் மேய்ச்சல் முடிந்து வரும் மாடுகளும் நீர் அருந்தித் தினவெடுக்கவென ஆவுரோஞ்சுத்தறிகளும் நாட்டப்பட்டிருக்கும்.

யாழ்ப்பாணத்தில் இன்றும் ஆவுரோஞ்சுத்தறிகளையும் சுமைதாங்கிகளையும் ஆங்காங்கே காணலாம். அவை பயன்பாடின்றி இருப்பதும் குறிப்பிடத்தக்கது.

வழிப்போக்கர்களுக்கும், கால்நடைகளுக்கும், பயன்படும் பொருட்டுக் கிணறு, குளம், கேணி, சுமைதாங்கி, மடம் முதலியன அமைக்கப்பட்டிருந்தமை எமது பண்பாட்டின் சிறப்பான அம்சம் எனக் கொள்ளலாம். யாழ்ப்பாணத்து வீதியோர மடங்கள் இளைப்பாறுவதற்கும் பயன்பட்டமை உண்மையே. நெல்லியடியில் அமைந்திருந்த மடத்திலிருந்து குடியரசு, கொம்யூனிசக் கருத்துக்கள் பற்றிய உரையாடல்கள் இடம்பெற்றதாகக் கூறப்படுகின்றது. இன்றும் ஆறுகால்மடம், மருதனார்மடம், பூதர்மடம், கந்தர்மடம், நாய்வேலர்மடம் முதலான இடப்பெயர்கள் தெருவோர மடங்கள் இருந்தமையை நினைவூட்டுகின்றன. நாய்வேலர்மடம் இன்று நாவலர்மடமாகப் பெயர் மாறியது எமது பண்பாட்டின் ஒரு பரிமாணமே எனலாம்.