தென் இலங்கைக் கரையினில் தொன்மைமிகு சிவாலயம்

இலங்கையின் தென் கரையில் காலி மாநகரில் மீனாட்சி சுந்தரேஸ்வரம் என்ற பழம்பெரும் வரலாற்றுச் சிறப்புமிக்க சிவாலயம் அமைந்துள்ளது. இற்றைக்கு ஆயிரம் ஆண்டுகளுக்கு முன்னர் பாண்டிய அரசர்களால் திருப்பணி செய்யப்பட்ட இச்சிவாலயம் பல்லாயிரம் ஆண்டுகள் பழைமை கொண்டதாக நம்பப்படுகின்றது.

- 

தமிழ் அரசர்களான பாண்டியரின் செல்வாக்கு தென்னிலங்கையில் மேலோங்கி இருந்தமைக்கு இச்சிவாலயம் சான்று பகர்கின்றது. பாண்டியரின் இலச்சினையான மீன் சின்னம் இவ்வாலய வாயிலிலிருந்து கருங்கற்தூணில் பொறிக்கப்பட்டுள்ளமையும் கருங்கல்லிலாலான ஆலய அர்த்த மண்டப விமானத்தில் குறித்த பாண்டியரின் இலச்சினையான மீன் சின்னங்கள் நான்கு பொறிக்கப்பட்டுள்ளமையும் இச்சிவாலயத்துக்கும் தென்னிந்திய தமிழ்ப் பேரரசான பாண்டிய அரசுக்கும் இருந்த தொடர்பை வெளிப்படுத்துகின்றது.

வருடாந்த மகோற்சவம் சித்திரா பௌர்ணமி தீர்த்தோற்சவத்துடன் நிறைவடையும். இவ்வாலயம் தென்னிலங்கைக் கரையினிலே தென் மாகாணத்தின் தலைநகரான காலி மாநகரின் மத்தியிலே மாவட்ட செயலகம், மாநகர சபை அலுவலகம், அஞ்சல் அலுவலகம், ரயில் நிலையம், பேருந்து நிலையம் உட்பட பல அலுவலகங்களுக்கு அண்மித்ததாயமைந்துள்ளது.

இந்த ஆலயம் தொடர்பான புராண கால செய்திகள் பலவும் உள்ளன. திருக்கேதீஸ்வரம், முன்னேஸ்வரம், மாமாங்கேஸ்வரம் ஆகிய சிவாலயங்களில் இராமபிரான் வழிபட்டமை போன்று திருக்கோணேஸ்வரம், தொண்டீஸ்வரம், மீனாட்சி சுந்தரேஸ்வரம் ஆகிய சிவத்தலங்களில் இராவணேஸ்வரன் வழிபட்டதாகவும் கூறப்பட்டுள்ளது. அத்துடன் அனுமான் சஞ்சீவி மலையைத் தூக்கி வரும்போது இந்த காலி சிவாலயத்தில் வழிபட்டதாகவும் கூறப்படுகின்றது. அனுமான் ஆகாய மார்க்கமாகத் தூக்கி வந்த சஞ்சீவி மலையின் ஒரு பகுதி இச்சிவாலயத்துக்கு அருகில் விழுந்ததாகவும் கூறப்படுகின்றது. இன்றும் சஞ்சீவிச் செடிகள் உள்ள ஒரு மலை இச்சிவாலயத்துக்குச் சமீபமாகவுள்ளது.

'ருமஸ்தலகந்த' என்று அழைக்கப்படும் மலையே அதுவாகும். அப்பகுதி மக்கள் அனுமானால் கொண்டு வரப்பட்ட மலையின் ஒரு பகுதியே ருமஸ்தலகந்த மலை என்று நம்பிக்கை கொண்டுள்ளனர்.

இவற்றை நோக்குமிடத்து புராண கால மான இராமாயண காலத்து வரலாறு கொண்டதும் உலகிலுள்ள பழம்பெரும் வழிபாட்டுத் தலங்களில் ஒன்றாகவும் இலங்கையின் பல்லாயிரம் ஆண்டுகள் பழைமையும் வரலாற்று சிறப்பும் கொண்ட சிவாலயமாகவும் காலி மீனாட்சி சுந்தரேஸ்வரத்தைக் கொள்ளலாம்.