நீடித்திருக்கக்கூடிய மாற்றத்துக்கான கருத்தொருமிப்பை கட்டியெழுப்புதல்

சமகாலத்தின் அறிகுறிகளைப் புரிந்து கொள்வதில் அரசாங்கம் முன் அவதானத்துடனும் நல்லறிவுடனும் நடந்து கொள்கிறது. நாடு தொடர்ந்தும் பொருளாதார நெருக்கடியில் உழன்று கொண்டிருக்கிறது. கடந்த 76 வருடங்களாக இலங்கையை ஆட்சிசெய்த எதிர்க்கட்சிகளின் கூட்டு ஒன்றுக்கு முகங் கொடுப்பதில் அரசாங்கம் வெல்லமுடியாத சவால்களை எதிர்நோக்குகிறது. அமெரிக்காவும் இஸ்ரேலும் கூட்டாக சர்வதேச சட்டத்தை அப்பட்டமாக அவமதித்து ஈரானின் அணுவசதிகள் மீது குண்டுத் தாக்குதல்களை நடத்திவரும் நிலையில், உலகம் பெரும் நெருக்கடியில் சிக்கியிருக்கிறது.

- 

இத்தகைய கொந்தளிப்பான நிலைவரத்துக்கு மத்தியில், மிகவும் நிதானமாக செயற்பட வேண்டியதும் கோட்பாட்டு அடிப்படையில் மாற்றத்தைக் கொண்டு வருவதற்கான பரிசோதனையில் யதார்த்த நிலைவரத்தை புரிந்துகொள்ளாமல் செயற்படுவதை தவிர்க்க வேண்டியதும் அவசியமானதாகும். குறிப்பாக, சிறிய மற்றும் அபிவிருத்தி குன்றிய நாடுகளின் அரசாங்கங்கள் உலக அதிகார அரசியலினால் திணிக்கப்படுகின்ற கட்டமைப்பு ரீதியான நெருக்குவாரங்களுக்கு மத்தியில், அவற்றின் கோட்பாட்டு நோக்குகளில் சமநிலையைப் பேணுவது அவசியமாகும்.

சர்வதேச அதிகார கட்டமைப்பை அரசாங்கம் முழுமையாக உணர்ந்திருக்கிறது போன்று தெரிகிறது. பொருளாதார நெருக்கடியை வெற்றி கொள்வதற்கான முயற்சிகளில் அரசாங்கம் கடைப்பிடிக்கின்ற முறைகளில் இதைக் காணக்கூடியதாக இருக்கிறது.

அரசாங்க தலைமைத்துவத்தின் கோட்பாடு மார்க்சியத்தில் வேர்கொண்டதாக இருந்தாலும், புதிய பாதை ஒன்றை வகுப்பதற்காக உலக முதலாளித்துவ முறைமையையும் சர்வதேச நாணய நிதியம் போன்ற அதன் அதிகாரக் கட்டமைப்புகளையும் இன்னமும் விமர்சனம் செய்யவில்லை. பதிலாக, பொருளாதார நெருக்கடியை வெற்றி கொள்வதற்கு சர்வதேச நாணய நிதியம் முன்வைத்த யோசனைகளுக்கு இசைவாக அரசாங்கம் செயற்படுகின்றது. அத்தகைய தந்திரோபாயம் "சமநிலையான நடத்தை" ((Balance behaviour) யதார்த்தவாத கோட்பாட்டாளர்கள் (Theorists of structural realism) வர்ணிக்கின்ற போக்குடன் ஒத்துப் போகிறது. உலக நிறுவனங்களின் அதிகாரத்தை விளங்கி ஏற்றுக்கொண்டு அவற்றுக்கு இசைவான முறையில் தேசிய கொள்கைகள் முன்னெடுக்கப்படுகின்றன.

உலக நிதிமுறைமையின் கண்ணாடி வில்லையின் ஊடாக நோக்கும்போது சர்வதேச நாணய நிதியம் அமெரிக்கா தலைமையிலான தற்போதைய சர்வதேச பொருளாதார அதிகாரக் கட்டமைப்பை உருவகப்படுத்தி நிற்கிறது. இலங்கை மக்கள் தாங்கிக்கொள்ள நிர்ப்பந்திக்கப்படுகின்ற பொருளாதார இடர்பாடுகளின் சுமையை சமுதாயத்தின் சகல பிரிவினரும் ஒப்புரவான முறையில் பகிர்ந்து கொள்ளவில்லை. சர்வதேச நாணய நிதியத்தின் யோசனைகள் அந்த ஒப்புரவற்ற சுமையை குறைக்கவில்லை. முன்னாள் ஜனாதிபதி ரணில் விக்கிரமசிங்க தலைமையிலான அரசாங்கத்தினால் இணங்கிக்கொள்ளப்பட்ட கடன் மறுசீரமைப்பு உடன்படிக்கையின் நிபந்தனைகளில் பெரும்பாலானவற்றை அரசாங்கம் நிறைவேற்றுகின்றது.