விட்டுக் கொடுப்புடன் முஸ்லிம் காங்கிரஸுடன் சில சபைகளில் இணைந்து ஆட்சியமைக்க வேண்டியுள்ளது

நாங்கள் எந்தக் கட்சியுடனும் ஒப்பந்தம் செய்து சபைகளைக் கைப்பற்ற முயற்சிக்கவில்லை. ஸ்ரீலங்கா முஸ்லிம் காங்கிரஸில் இருக்கின்ற உறுப்பினர்கள் எங்களுக்கு ஆதரவு தருகின்றார்கள். சில சபைகளில் முஸ்லிம் காங்கிரஸுடன் இணைந்து ஆட்சியமைக்க வேண்டிய தேவை இருக்கின்றது என இலங்கைத் தமிழரசுக் கட்சியின் மட்டக்களப்பு மாவட்ட பாராளுமன்ற உறுப்பினர் இரா. சாணக்கியன் தெரிவித்தார்.

- 

இலங்கைத் தமிழரசுக் கட்சியின் மட்டக்களப்பு மாவட்டத்தில் தெரிவான உள்ளூராட்சி மன்ற உறுப்பினர்களது சத்தியப் பிரமாண நிகழ்வு நேற்று (10) நடைபெற்றது. தமிழரசுக் கட்சியின் மட்டக்களப்பு மாவட்ட உறுப்பினர்களான ஞா. சிறிநேசன், இ. சிறிநாத் உட்பட கட்சியின் முக்கியஸ்தர்கள் கலந்து கொண்ட இந்நிகழ்வில் அவர் மேலும் தெரிவிக்கையில்,

“நடந்து முடிந்த தேர்தல் வடக்கு, கிழக்கைப் பொறுத்தமட்டில், இலங்கைத் தமிழரசுக் கட்சிக்கு பாரிய வெற்றி கிடைத்திருக்கின்றது. கடந்த 2018ஆம் ஆண்டு நடைபெற்ற உள்ளூராட்சி மன்றத் தேர்தலுடன் ஒப்பிட்டுப் பார்க்கின்ற போது, இம்முறை இலங்கைத் தமிழரசுக் கட்சிக்கு மட்டக்களப்பு மாவட்டத்தில் 86 உறுப்பினர்கள் நேரடியாகத் தெரிவு செய்யப்பட்டிருக்கின்றார்கள். அது உண்மையில் எங்களுடைய கட்சிக்குப் பெரு வெற்றியாகும்.