వికసిత భారతంలో విజయ దీపావళి

మన పండగలలో సరదాల పండగ, అన్నీ మరచి, అన్ని వయసులవారూ ఆనందంగా జరుపుకునే పండగ దీపావళి.

- పి.యస్.యమ్. లక్ష్మి

మన పండగలలో సరదాల పండగ, అన్నీ మరచి, అన్ని వయసులవారూ ఆనందంగా జరుపుకునే పండగ దీపావళి. ఇది ఆశ్వయుజ బహుళ అమావాస్య రోజున వస్తుంది. సాధారణంగా చెడుపై మంచి సాధించిన విజయానికి గుర్తుగా పండుగలు జరుపుకుంటాం. పండుగలకి సంబంధించి అనేక గాథలు వుంటాయి. అలాగే దీపావళికి సంబంధించి కూడా అనే కథలు వున్నాయి.

ఈ దీపావళి రోజున మహాలక్ష్మిని పూజిస్తారు. వ్యాపారస్తులు తప్పనిసరిగా తమ షాపుల్లో లక్ష్మీ పూజ చేస్తారు. కొందరు కొత్త దస్త్రాలు తెరుస్తారు. మరి మనం కూడా పండుగ చేసుకునేటప్పుడు దాని వెనుకనున్న మహిమాన్వితమైన కథలు తెలుసుకోవాలి కదా. దీపావళికి సంబంధించిన కథలలో ముందుగా దీపావళి రోజున మహాలక్ష్మిని పూజించటానికి వెనక వున్న కథ తెలుసుకుందాం.

మహాలక్ష్మిని ఎందుకు పూజించాలి?

ఒకసారి దూర్వాస మహర్షి ఇంద్ర లోకానికి వెళ్ళి, దేవేంద్రుడిచ్చిన ఆతిథ్యానికి సంతోషించి, ఆయనకి ఒక మహిమాన్వితమైన హారాన్ని బహూకరిస్తాడు.

ఇంద్రుడు దానిని తృణీకార భావనతో తన వద్దనున్న ఏనుగు ఐరావతం మెడలో వేస్తాడు. దానికేం తెలుసు.. హారం విలువ. అది ఆ హారాన్ని కాలితో తొక్కివేస్తుంది.

అసలే దూర్వాస మహాముని. ఈ అవమానాన్ని సహిస్తాడా? దేవేంద్రుణ్ణి శపించాడు. ఆ శాప కారణంగా దేవేంద్రుడు రాజ్యం, సర్వ సంపదలు పోగొట్టుకుని, దిక్కుతోచక శ్రీ మహావిష్ణువుని ప్రార్థిస్తాడు.

శ్రీ మహావిష్ణువు దేవేంద్రుని ఒక జ్యోతిని వెలిగించి, దానిని శ్రీ మహాలక్ష్మి స్వరూపంగా భావించి పూజించమని చెప్తాడు. దేవేంద్రుడు అలాగే చేస్తాడు. ఆ కూజలకు తృప్తి చెందిన లక్ష్మీదేవి అనుగ్రహంతో తిరిగి సర్వసంపదలను పొందాడని పురాణ కథనం.

శ్రీమహావిష్ణువు దగ్గర వున్న లక్ష్మీదేవిని ఇంద్రుడు, 'తల్లీ, నువ్వు ఎప్పుడూ శ్రీహరి దగ్గరే వుండటం న్యాయమా? నీ భక్తులను కరుణించవా?" అని అడుగుతాడు.

దానికి ఆ మాత "నన్ను త్రికరణ శుద్ధిగా ఆరాధించే భక్తులకు వారి వారి అభీష్టాలకు అనుగుణంగా సాక్షాత్కరిస్తాను.