గాంధీజీ.. సత్యాగ్రహ స్ఫూర్తి

1869 అక్టోబరు 2న గుజరాత్ రాష్ట్రంలోని పోర్బందర్ జన్మించిన గాంధీ బాల్యం నుండే సత్యం, నియమశీలత, త్యాగం వంటి విలువలతో పెరిగాడు.

- - రామకిష్టయ్య సంగనభట్ల

1869 అక్టోబరు 2న గుజరాత్ రాష్ట్రంలోని పోర్బందర్ జన్మించిన గాంధీ బాల్యం నుండే సత్యం, నియమశీలత, త్యాగం వంటి విలువలతో పెరిగాడు. తల్లి పుతిలీబాయి భక్తి శ్రద్ధలతో నిండిన స్త్రీ; తండ్రి కరంచంద్ కఠిన నైతిక విలువలతో కూడిన పరిపాలకుడు. ఈ ఇద్దరి ప్రభావం గాంధీ జీవనంలో లోతైన ముద్ర వేసింది. చిన్ననాటి నుంచి ఉపవాసం, నియమాలు, నిజాయితీ పట్ల అతనికి ఉన్న ఆకర్షణ తరువాతి కాలంలో ఒక విప్లవాత్మక ఉద్యమ నాయకత్వానికి పునాదిగా నిలిచింది. విద్యాభ్యాసం పూర్తి చేసిన తరువాత 1888లో గాంధీ లండన్ వెళ్లి న్యాయ విద్యాభ్యాసం చేశాడు. అక్కడ పాశ్చాత్య సంస్కృతి ఆకర్షించినప్పటికీ త్వరగానే తన భారతీయ మూలాలను గుర్తించి సాదాసీదా జీవనం, ఆచరణాత్మక ధర్మం వైపు మొగ్గు చూపాడు. 1891లో న్యాయవాది పట్టా పొంది స్వదేశానికి వచ్చినా, వృత్తిలో స్థిరపడలేక 1893లో దక్షిణాఫ్రికాకు వెళ్ళాడు. అక్కడే అతని జీవితం కొత్త మలుపు తిరిగింది.

పీటర్ మారిట్జ్ బర్గ్ రైల్వే స్టేషనులో వర్ణ వివక్ష కారణంగా ట్రైన్లోంచి బయటికి తోసేయబడిన అవమానం గాంధీ మనసును కలచివేసింది. ఆ అవమానం ఆయనను ఒక న్యాయవాది నుంచి సామాజిక పోరాట యోధుడిగా మలిచింది.