పావనం పట్టాభిరాముని దర్శనం

మన దేశం దేవ భూమి. పురాణాల ఆధారంగా స్వయంగా సర్వాంతర్యామి నడయాడిన దివ్య భూమి.

- ఇలపావులూరి వెంకటేశ్వర్లు

మన దేశం దేవ భూమి. పురాణాల ఆధారంగా స్వయంగా సర్వాంతర్యామి నడయాడిన దివ్య భూమి. మహర్షులు, గురువులు, కవులు దేవదేవుని లీలలను కీర్తిస్తూ ఎన్నో కావ్యాలు, కీర్తనలు రచించారు.

అక్షరాస్యత తక్కువగా ఉన్నప్పటికీ విని, వల్లె వేయడం వలన ఒక తరం నుండి మరో తరానికి వారసత్వంగా కొనసాగుతూ ప్రజలలో ఆదిదేవుని పట్ల భక్తి విశ్వాసాలు స్థిరంగా ఉండిపోయాయి. పాలకులు కూడా ప్రజలలో నిరాకారుని పట్ల నెలకొని ఉన్న ఆరాధనను గమనించి ఉరూరా ఆలయాలను నిర్మించారు. వారి ఆదరణలో ఉన్న కవిపండితులు కూడా పరమేశ్వరుని కీర్తిస్తూ కావ్యాలను రచించారు. పాలకుల వద్ద మంత్రులుగా, సేనాధిపతులుగా, దండనాయకులుగా, ఒక ప్రాంతానికి అధిపతులుగా ఉన్నవారు కూడా అనేక ఆలయాలను నిర్మించడం లేదా శిథిలావస్థలో ఉన్న ఆలయాలను పునః నిర్మించడం జరిగినట్లుగా శాసనాలు, స్థానిక కథనాల వల్ల తెలుస్తోంది.

ఇలా నిర్మించబడిన ఆలయాలు దేశం నలుమూలలా కనిపిస్తాయి. ముఖ్యంగా మన తెలుగు రాష్ట్రాలలో అనేకం కనిపిస్తాయి. అవన్నీ కూడా సుమారు క్రీస్తుశకం పదవ శతాబ్ద కాలానికి ముందే నిర్మించినట్లుగా శాసనాలు తెలియచేస్తున్నాయి. ఆ పురాతన దేవాలయాల విశేషాలు ప్రజలకు తెలియచేయవలసిన అవసరం, తెలుసుకొన్న భక్తులు సందర్శించవలసిన అవసరం కూడా ఎంతో ఉన్నది.

అష్టదిగ్గజాలు

విజయనగర పాలకులు కవిపండిత పక్షపాతులు. వారిని ఆదరించేవారు, సత్కరించేవారు. ప్రతిరోజూ కవితాగోష్టులు నిర్వహించేవారు అని చెబుతారు. మన పురాణాల ప్రకారం పృథ్వికి ఉన్న అష్టదిక్కులను ఎనిమిది ఏనుగులు కాపలా కాస్తుంటాయని తెలుస్తోంది. ఆ అష్ట గజాల పేర్లు ఐరావతం, పుండరీకం, వామనం, కుముదం, అంజనం, పుష్పదంతం, సార్వభౌమం, సుప్రతీకం.