నిస్వార్థం

ఆమెను నిత్యం గమనిస్తూనే ఉన్నాడు సంజీవి. ప్రతి గురువారం, శనివారాలు ఆమె వద్దనే పువ్వులు కొంటుంటాడు.

- పంతంగి శ్రీనివాసరావు

ఆమెను నిత్యం గమనిస్తూనే ఉన్నాడు సంజీవి. ప్రతి గురువారం, శనివారాలు ఆమె వద్దనే పువ్వులు కొంటుంటాడు. సంజీవి ఓ ప్రముఖ దినపత్రికలో ఎడిటోరియల్ స్టాఫ్ సీనియర్. ఎన్నో పరిశోధనాత్మక కథనాలు అతని కలం నుంచి జాలువారాయి. పాఠకులు అతని ఆర్టికల్స్ను ఎంతో ఇష్టంగా చదువుతుంటారు. అటువంటిది ఆమె అతడిని ఆకర్షించడానికి కారణం.. నడుము వంగిపోయినా, ఆమె కష్టపడే విధానం చూస్తుంటే ఎంతో జాలి కలుగుతోంది. ఒక్క రూపాయి కూడా అదనంగా ఉంచుకోదు.

ఒకరోజు తిరిగి చిల్లర ఇవ్వడానికి ఆమె దగ్గర రెండు రూపాయల కాయిన్ దొరకలేదు. ఎంత వెదికినా...

"ఫర్వాలేదు, వుండనివ్వు పెద్దమ్మా" అని చెప్పాడు సంజీవి.

"అందరూ పెద్ద నోట్లే ఇస్తారు బాబూ.. చిల్లర సమస్య" అని ఆగి"పోనీ, దానికి తగ్గ పూలు తీసుకుంటారా? అని అడిగింది.

"అవసరం లేదులే పెద్దమ్మా..” అంటూ ఆమె పిలుస్తున్నా అగకుండా వెనుదిరిగాడు సంజీవి. మరో రెండు రోజుల తర్వాత శనివారంనాడు ఆమె దగ్గరకు వచ్చాడు సంజీవి.

"పూలు ఇస్తావా పెద్దమ్మా..”.

అడిగాడు.

ఆమె పూలు ఇచ్చింది.

అతను దాగిన దానికి తగిన చిల్లర ఇచ్చాడు.

అందులోంచి ఒక రెండు రూపాయల కాయిన్ తిరిగిచ్చి, ఇంతకుముందు మీకు బాకీ పడినాను బాబూ" చెప్పింది.

ఆమె నిజాయితీకి అబ్బురపడ్డాడు సంజీవి.

"ఈ వయస్సులో ఇంతగా కష్టపడుతున్నావు, మీ ఇంట్లో మొగవాళ్ళు ఎవరూ లేదా పెద్దమ్మా?” అడిగాడు.

ఆమె ఒక చిరునవ్వు నవ్వింది.

“మనించవా.. మీ వ్యక్తిగత విషయాలు...” "అదేమీ లేదు బాబూ.. పెళ్లయిన నాలుగేళ్లకే మా ఆయన..” చేతులు పైకెత్తి ఆకాశం వేపు చూపించింది.

"అయ్యో పాపం.. మరి నీకు అన్నదమ్ములు..!" "మా అమ్మా నాన్నలకు నేను ఒక్కదానినే”

ఇలా అడుగుతున్నందుకు ఏమీ అనుకోవద్దమ్మా... మీకు మేనమామలు..

వారి సంతతి.. బంధుజనం” "నేను ఒంటరిని బాబూ" అని ఆగి “ఇక నా వారసత్వం, ఆస్తిపాస్తులు అంటూ అడుగుతావని తెలుసు.. అని చిద్విలాసంగా నవ్వి.."మా తాతగారు ఉన్న ఆస్తిని స్వాతంత్రోద్యమానికి ధారపోసిన మహనీయుడు. మా అమ్మను కూడా ఆ ఉద్యమంలోకి నడిపించిన గొప్ప వ్యక్తి..” ఆమె మాటల్లో ఎంతో గర్వం.

"ఏమిటి! మీది స్వాతంత్రోద్యమ కుటుంబమా! ఇంట్రస్టెడ్.. నేను పత్రికాఫీసులో పని చేస్తాను. మీ అమ్మగారి గురించి కొన్ని వివరాలు చెపుతావా?" అడిగాడు సంజీవి.