కణ్వమహర్షి తపస్సు చేసిన స్థలం

దక్షిణ భారతదేశంలో శ్రీ నృసింహ ఆరాధన ఎక్కువ. అందుకే శ్రీ నృసింహ ఆలయాలు దక్షిణాదిన అధికం.

- 'ఇలపావులూరి వెంకటేశ్వర్లు

దక్షిణ భారతదేశంలో శ్రీ నృసింహ ఆరాధన ఎక్కువ. అందుకే శ్రీ నృసింహ ఆలయాలు దక్షిణాదిన అధికం. తమిళనాడు, కర్ణాటక, కేరళలో చాలా విశేష నృసింహ ఆలయాలు ఉన్నాయి. మన తెలుగు రాష్ట్రాలలో కూడా అనేక పురాతన శ్రీలక్ష్మీ నారసింహ ఆలయాలు నెలకొని ఉన్నాయి.

ఆంధ్రప్రదేశ్, తెలంగాణా రాష్ట్రాలలో స్వామి నడయాడిన క్షేత్రాలుగా పేర్కొనే నవ నారసింహ క్షేత్రాలు ఉన్నాయి. అవి అహోబిలం, సింహాచలం, వేదాద్రి, మంగళగిరి, అంతర్వేది, మాలకొండ(మాల్యాద్రి), పెంచలకోన, యాదాద్రి, ధర్మపురి.

శ్రీ వరాహ లక్ష్మీ నారసింహ స్వామి కొలువైన సింహాచలం, స్వామి లోకకంఠకుడైన హిరణ్యకశ్యపుని సంహరించిన ప్రదేశంగా ప్రఖ్యాతి గాంచిన అహోబిలం వీటిలో మొదటి వరసలో ఉంటుంది. ప్రతి ఒక్క క్షేత్రం తమవైన పురాణ గాథలు కలిగి వుండటం విశేషం. నారసింహ అవతారంలో స్వామి చెంచులక్ష్మి అమ్మవారిని వివాహం చేసుకొన్న స్థలంగా నెల్లూరు జిల్లాలోని పెంచలకోన (పెనుశిల) ప్రఖ్యాతి గాంచింది.

క్షేత్ర గాథ

చుట్టూ పర్వతాలు, వాటి నుంచి జాలువారే జలపాతాలు..నగర జీవితానికి భిన్నంగా వుండే ప్రశాంత వాతావరణం ఈ ఆలయ ప్రత్యేకత. కొండల మీద ప్రవహించే కండలేరు ఆలయ వెనుక భాగాన పెద్ద జలపాతంగా మారి నేలకు జాలువారుతుంది. ముఖ్యంగా వర్షాకాలంలో చాలా సుందరంగా ఉంటుందా దృశ్యం. గతంలో ఈ ప్రదేశం ఋషివాటిక. శ్రీ కణ్వమహర్షి తపస్సు చేసిన ప్రదేశమిది. ఈయన ప్రస్తావన అనే పురాణాలలో కనిపిస్తుంది... ముఖ్యంగా మహాభారతంలో. మేనకా, విశ్వామిత్రుల పుత్రిక అయిన శకుంతలను పెంచిన తండ్రి కణ్వమహర్షి. శకుంతల కుమారుడైన భరతుని వల్లనే కదా మన దేశానికి భరతభూమి అన్న పేరు వచ్చిన విషయం మనందరికీ తెలుసు. కణ్వమహర్షి శ్రీ నారసింహుని గురించి తపస్సు చేసి స్వామివారి దర్శనాన్ని పొందిన స్థలం ఇదేనని అంటారు.