புதிதாக பிறந்த குழந்தைகளின் மஞ்சள் கண்கள் ஆபத்தின் அறிகுறியா?

பிறந்த பிள்ளைகள் கண்கள் கொஞ்சம் மஞ்சள் நிறமாவது சாதாரணமானது ஆனால் அது வேகொஞ்சம் அதிகரித்தால் மிகவும் ஆபத்தானது என்பது உங்களுக்குத் தெரியுமா?

- டொக்டர் அர்ஷாத் அஹமட் குழந்தைநல மருத்துவர் மற்றும் நியோனடோலஜிஸ்ட் சம்மாந்துறை

பிறந்த குழந்தைகளுக்கு மஞ்சள் நிற ஆடை அணிவிப்பது கூடாது என்பது உங்களுக்கு தெரியுமா? பிறந்த குழந்தைகளுக்கு மஞ்சள் போட்டு குளிப்பதும் கூடாது என்பது உங்களுக்கு தெரியுமா?

இவை தெரிந்தால் நான் ஏன் இதை வாசிக்க போகிறேன்? என்று தானே நினைக்கிறீர்கள். அப்படியானால் மேலே படியுங்கள்.

தோல், உடல் திசுக்கள், மற்றும் உடல் திரவங்கள் மஞ்சள் நிறமாக மாறும் ஒரு நிலை மஞ்சள் காமாலை (Jaundice) என்று அழைக்கப்படும். பெரும்பாலும், இந்த நிறமாற்றத்தை தோல் அல்லது கண்களின் வெள்ளைப் பகுதிகளில் பொதுவாக காணலாம். தோலில் இந்த மாற்றத்தை தெளிவாக பார்ப்பதற்கு தமது தோல் வெள்ளையாக இருக்க வேண்டும் என்பதை கவனத்தில் கொள்ளவும்.

இரத்தத்தில் அதிகம் பிலிரூபின் எனப்படும் பித்தப்பதார்த்தம் (Bilirubin) தேங்கி நிற்பதால் இந்த மஞ்சள் நிறம் ஏற்படுகிறது. பிலிரூபின் என்பது நமது இரத்தத்தில் உள்ள சிவப்பணுக்கள் (RBC) சிதைவடையும் போது விடுவிக்கப்படும் ஒரு நிறப்பொருள். இது பித்தத்தின் வழியாக மலத்துடன் கலந்து உடலை விட்டு வெளியேற்றப்படுகிறது. மலம் மஞ்சளாக இருப்பதற்கு இது தான் காரணம்.

உடலில் இருந்து வெளியேற்றப்பட வேண்டிய இந்த மஞ்சள் பதார்த்தம் ( Bilirubin ) உடலில் உள்ளே தங்கி விடுவதற்கு பல்வேறு நோய் நிலைமைகள் காரணமாக இருக்கின்றன. புதிதாக குழந்தைகளில், சிறுவர்களில், பெரியவர்களில் என்று இதற்கு வெவ்வேறு காரணங்கள் இருக்கின்றன. அதிலும் குறிப்பாக புதிதாக பிறந்த குழந்தைகளில் இதற்கான காரணங்கள் விசேடமானவை.