கல்வியியற் கல்லூரிகள் ஊடான ஆசிரிய நியமனங்களை அந்தந்த மாவட்டங்களிலேயே மேற்கொள்ள வேண்டும்

கல்வியியற் கல்லூரிகளின் ஊடான ஆசிரிய நியமனங்களை அந்தந்த மாவட்டங்களிலேயே மேற்கொள்ள நடவடிக்கை எடுக்க வேண்டும் என்று இலங்கை தமிழரசுக் கட்சி பாராளுமன்ற உறுப்பினர் எஸ்.சிறீதரன் கல்வி அமைச்சரிடம் கோரிக்கை விடுத்தார்.

- பா.கிருபாகரன். ந.ஜெயகாந்தன்

பாராளுமன்றத்தில் நேற்று செவ்வாய்க்கிழமை நிலையியல் கட்டளை 27/2இன் கீழ் பிரதமரும், கல்வி, உயர் கல்வி மற்றும் தொழிற்கல்வி அமைச்சருமான ஹரிணி அமரசூரியவிடம் கேள்வியெழுப்பி உரையாற்றும் போதே சிறீதரன் எம்.பி இவ்வாறு கோரிக்கையை முன்வைத்தார்.

இதன்போது சிறீதரன் எம்.பி கூறுகையில்,

ஒரு மாவட்டத்தில், குறித்த ஓர் பாடத்திற்கு நிலவும் ஆசிரிய ஆளணி வெற்றிடம் மற்றும் தேவைப்பாடு என்பவற்றின் அடிப்படையிலேயே, தேசிய கல்வியியற் கல்லூரிகளுக்கான அனுமதிகள் வழங்கப்படுகின்றன என்பதையும், அதே அடிப்படையிலேயே கல்வியியற் கல்லூரிகளுக்கு முகிழ்நிலை மாணவர்கள் சேர்த்துக்கொள்ளப்படுகிறார்கள் என்பதையும் அமைச்சர் ஏற்றுக்கொள்வாரா?

அந்தவகையில், மாவட்டங்களின் ஆளணித் தேவைப்பாட்டுக்கமைய சேர்த்துக் கொள்ளப்படும் மாணவர்கள் இரண்டுவருட கற்கைநெறி, ஒருவருட பயிற்சிக்காலம் என்பவற்றின் நிறைவில், எந்த நியாயப்பாடுகளுமற்று இலங்கையின் தென்பகுதியிலுள்ள பாடசாலைகளுக்கு நியமனம் செய்யப்படுவது நியாயமானதா என்பதை அமைச்சர் இச்சபைக்கு அறிவிப்பாரா?