உறுதியாக மீண்டு வர முடியும்

இன்றைய வேகமான வாழ்க்கை முறை, போட்டி நிலை, எதிர்பார்ப்புகள் மற்றும் பல்வேறு சமூக, பொருளாதார சவால்கள் காரணமாக மன அழுத்தம் என்பது மனித வாழ்வில் அடிக்கடி காணப்படும் ஒரு நிலையாகி விட்டது.

- பா.லோகேஸ்வரி

இது இயல்பு நிலையில் ஏற்படும் உடனடி எதிர்வினையாக இருக்கலாம். ஆனால் அது நீடித்துப் போனால், நபரின் உடல், மனம் மற்றும் சமூக வாழ்வில் பெரிய பாதிப்புகளை ஏற்படுத்தும். இது ஒரு நீடித்த மனநிலை மாற்றமாகும். சாதாரண சோகத்தினைப் போல ஒரு சில மணி நேரங்களோ அல்லது ஒரு சில நாட்களோ மட்டும் நீடிப்பதல்ல. பல வாரங்கள், மாதங்கள் அல்லது சில நேரங்களில் ஆண்டுகளுக்குப் பிறகும் நீடிக்கக்கூடிய ஒரு ஆழமான உளவியல் பிரச்சினையாகும்.

மனச்சோர்வில் உள்ள ஒருவர் தன்னுடைய வாழ்க்கையை பொறுத்தவரை பெரும்பாலும் ஏமாற்றத்துடனும் வெறுமையுடனும் காணப்படுகிறார். அவர்களுக்கு முன்னர் மகிழ்ச்சி அளித்த விடயங்களிலும் இனி ஆர்வமில்லை. அந்த நபரின் உணர்வுகள் மட்டுமல்லாது, சிந்தனை, உறவுகள், தூக்கம், உணவு, வேலை போன்ற அனைத்து துறைகளிலும் பாதிப்பு ஏற்படுகிறது.

மனச்சோர்வு என்பது ஒரு நோயாகவே மருத்துவ ரீதியாகக் கருதப்படுகிறது. இது ஒருவரின் மூளையில் ஏற்படும் வேதிப்பொருள் மாற்றங்கள், வாழ்க்கை அனுபவங்கள், மரபணுக்கள், சமூக சூழ்நிலை போன்றவற்றால் உருவாகலாம். ஒரு சிலருக்கு அது வெளிப்படையாக அறிகுறிகளாகத் தெரிந்தாலும், பலருக்கு அது உள்ளுணர்வாகவே இருந்து, வெளிப்படாது சுமை போல் மனதை அழுத்திக்கொண்டு செல்கிறது.

மனச்சோர்வின் போது நான் போதுமானவனல்ல, எனக்கு எதிலும் அர்த்தமில்லை, என் வாழ்நாளில் சுகம் கிடையாது போன்ற எண்ணங்கள் பெரும்பாலும் தோன்றுகின்றன. இது அவர்களை தனிமையிலும், அமைதியின்மையிலும் தள்ளி, கூடுவதை விட விலகி வாழும் நிலைக்கு கொண்டு செல்லும்.

மனச்சோர்வின் வகைகள்

மனச்சோர்வு என்பது ஒரே மாதிரியான நிலை அல்ல. அது பல்வேறு வடிவங்களில், பல்வேறு தீவிர நிலைகளில் காணப்படும். ஒவ்வொரு வகையும் தனித்துவமான அறிகுறிகளையும், காரணங்களையும் கொண்டிருக்கிறது.

1. முக்கியமான மனச்சோர்வு நிலை (Major Depressive Disorder-MDD)

இது மிகவும் பொதுவாக, காணப்படும் மனச்சோர்வின் ஒரு வடிவம். இதில் குறைந்தது 2 வாரங்களுக்கு மேலாக, சோர்வு உணர்வு, ஆர்வமின்மை, ஆற்றல் குறைப்பு, தூக்கக்குறைவு, கவலை, குற்ற உணர்வு, நம்பிக்கையின்மை போன்ற தீவிரமான அறிகுறிகள் தோன்றும். தினசரி செயல்களில் ஈடுபட முடியாத நிலைக்கும் இது கொண்டு செல்லலாம். சில நேரங்களில் தற்கொலை எண்ணங்களும் தோன்றும்.