Reg vir nog 40 Goue Jare

Wat begin het as 'n gesellige kuier oor 'n koppie tee en heerlike gebak tussen 'n paar vroue by Sera Arendse se huis, vier die Goue Jare-dienssentrum in Malmesbury 40 jaar later sy bestaan met trots, geloof en dankbaarheid.

- 

Die Goue Jare-dienssentrum se voorsitter, Heinrich Harte, en die koördineerder Veronica van Harte, sny die koek, geskenk deur Super Spar Malmesbury, ter viering van 40 jaar se bestaan.

'n Klub het sy ontstaan op 11 September 1985 gekry nadat plaaslike vroue die behoefte raakgesien het om hul leed en ook liefde onder mekaar te deel, daar te wees vir ander en die nodige steun te bied waar nodig.

Die ledetal het oor die jare gegroei en hulle het later by die plaaslike VGK-Malmesbury gemeente se saal byeengekom. In 2004 is die Goue Jare-dienssentrum amptelik met behulp van 'n maatskaplike werkster as 'n organisasie sonder winsbejag gestig. Pieter Swarts was die eerste voorsitter, gevolg deur Angela de Lora, Sophia Arendse en Nellie Mentoor.

Die begin van die klub, soos steeds na die sentrum verwys word, was wankelrig. Dié klublede het hul ewige tuiste in die Alpha Outreach-sentrum in Roosstraat danksy die nodige hulp van die Swartland-munisipaliteit gevind.

Heinrich van Harte, die voorsitter sedert 2016, verduidelik die Goue Aartehuis vir bejaardes én die Goue Jare-dienssentrum se bestaan is op dieselfde perseel van stapel gestuur, vandaar die verwarring tussen die twee.