આજે PM મોદી પુતિન માટે હાઈ ડિનરની યજમાની કરશેઃ ડિફેન્સ ડીલ પર સમગ્ર દુનિયાની નજર

મોદી-પુતિનની આગેવાની હેઠળ આવતી કાલે ૨૩મું વાર્ષિક શિખર સંમેલન યોજાશે

- 

રશિયાના રાષ્ટ્રપતિ વ્લાદિમીર પુતિન આજે તેમના વિશેષ વિમાન દ્વારા નવી દિલ્હી પહોંચશે. તેઓ પોતાના સૌથી મોટા કેબિનેટ દળ સાથે ભારત આવી રહ્યા છે. નવી દિલ્હી પહોંચ્યાના થોડા જ સમય બાદ વડા પ્રધાન નરેન્દ્ર મોદી સાથે તેમની મુલાકાત વડા પ્રધાન નિવાસસ્થાને થશે. આ મુલાકાત દરમિયાન તેમના સન્માનમાં ‘હાઈ ડિનર’નું પણ આયોજન કરવામાં આવ્યું છે. આ બેઠક લાંબો સમય ચાલે તેવી સંભાવના છે. બંને દેશો વચ્ચે અનેક કરાર થવાની શક્યતા છે, પરંતુ ડિફેન્સ ડીલ પર સમગ્ર દુનિયાની નજર રહેશે.

મોદી અને પુતિનની આગેવાની હેઠળ આવતી કાલે ૨૩મું ભારત-રશિયા વાર્ષિક શિખર સંમેલન યોજાવા જઈ રહ્યું છે. આ સમયે રશિયા પાસેથી તેલ ખરીદવા બાબતે અમેરિકા ભારત પર કૂટનૈતિક અને આર્થિક દબાણ લાવવાનો પ્રયાસ કરી રહ્યું છે ત્યારે રાષ્ટ્રપતિ પુતિનની નવી દિલ્હીની યાત્રા પર આખી દુનિયાની નજર ટકેલી છે. પુતિનની આ યાત્રા પહેલાં ભારતીય વિદેશ મંત્રાલય અને રશિયન રાષ્ટ્રપતિ ભવન દ્વારા જણાવવામાં આવ્યું છે કે આ વખતે બંને દેશો માટે આર્થિક અને વેપારી મુદ્દાઓ ઘણા મહત્ત્વના રહેશે. પુતિનની કેબિનેટમાં આર્થિક વિભાગો ના તમામ પ્રધાનો તેમની સાથે નવી દિલ્હી આવી રહ્યા છે, જે આ વાતનો સંકેત આપે છે.