'Slaughterhouse' para sa sabungeros

HABANG patuloy ang paghahanap ng Philippine Coast Guard (PCG) sa mga buto ng nawawalang sabungeros, patuloy din ang pagsisiwalat ng whistleblower na si Julie Patidongan alyas Totoy sa mga nangyari. Dinetalye ni Patidongan ang pagpatay sa mga sabungeros na aniya ay mistulang kinakatay sa slaughterhouse sa Laurel, Batangas. Hindi lamang umano sabungeros ang pinapatay sa slaughter house kundi mayroon ding buntis at saka bata. Hindi naman sinabi ni Patidongan kung ang bata at buntis ay kabilang sa mga inilagay sa sako at saka inihulog sa lawa.

- 

Limang sako na may mga buto ang narekober ng divers ng PCG sa Taal Lake mula nang simulan ang paghahanap sa mga bangkay ng nawawalang sabungeros noong Hulyo 10. Ayon sa PCG, maingat ang ginagawa nilang pag-aahon sa mga sako para hindi ito masira.

Noong Lunes, nagsampa na ng reklamo sa NAPOLCOM si Patidongan laban sa 12 pulis na sangkot sa pagdukot sa mga sabungeros. Pinangalanan na rin niya ang isang dating retiradong heneral na naging hepe ng NCRPO.

Kasama ni Patidongan sa pagsasampa ng reklamo ang kaanak ng missing sabungeros.