நலம் காக்கும் ஸ்டாலின்

நகர்ப்புறத்தில் வசதியானவர்களுக்கு கிடைப்பதைப்போல கிராமப்புற ஏழைகளுக்கும் மருத்துவ சேவை கிடைப்பதை உறுதி செய்வோம் என்று முதலமைச்சர் மு.க. ஸ்டாலின் உரையாற்றினார்.

- 

முதலமைச்சர் மு.க. ஸ்டாலின் இன்று சென்னை சாந்தோமில் தனியார் பள்ளி வளாகத்தில் நடைபெற்ற நலம்காக்கும் ஸ்டாலின் சிறப்பு மருத்துவ முகாமை தொடங்கி வைத்து உரையாற்றினார். அப்போது அவர் பேசியதாவது :-

நான் மருத்துவமனையில் இருந்தபோதும், அரசு அதிகாரிகளிடம் தொடர்ந்து ஆலோசனை நடத்திக்கொண்டுதான் இருந்தேன். சில அவசரகோப்புகளை கவனித்ததோடு, "உங்களுடன் ஸ்டாலின்" முகாம் எப்படி நடைபெறுகிறது என்று மாவட்ட ஆட்சியர்கள் - பொதுமக்கள் என்று காணொலி வாயிலாக விசாரித்தேன்.

தூத்துக்குடிக்கு வந்த பிரதமரிடம் தமிழ்நாட்டு மக்களின் சார்பில் அளிக்கவேண்டிய கோரிக்கைகள் அடங்கிய மனுவையும் தயார் செய்து அனுப்பிவைத்தேன். ஏனென்றால், உடல்நலம் பாதிக்கப்பட்டு மருத்துவமனையில் இருந்தாலும், மக்கள் பணியாற்ற வேண்டும் ! இதுதான் என்னுடைய விருப்பம்!

நான் தொடக்கத்தில் கூறியதுபோல, மருத்துவமனையிலிருந்து வீடு திரும்பிய பிறகு, நேற்று முன்தினம் தலைமைச் செயலக அலுவலத்திற்குச் சென்று என்னுடைய வழக்கமான பணிகளை தொடங்கினேன். அப்போது என்னுடைய செயலாளர்கள் கூட சொன்னார்கள். " வெளி நிகழ்ச்சிகளை ஒரு வாரத்திற்கு தள்ளி வைக்கலாமா?" என்று கேட்டார்கள். "இல்லை, அதையெல்லாம் தள்ளி வைக்க வேண்டாம்,

மக்களைச் சந்தித்தால் தான் எனக்கு உற்சாகம் வரும்-என்னுடைய உடலில் ஏதாவது நோய் இருந்தால் அது சரியாகிவிடும். எனவே, மக்கள் பணியை செய்தால், அதுவே எனக்கு உடல் நலத்தைக் கொடுத்துவிடும்" என்று சொல்லிவிட்டு தான் நான் இங்கு வந்திருக்கிறேன்.

மருத்துவமனையில் இருந்து வந்த பிறகு, கோட்டைக்கு வெளியே நான் கலந்து கொண்டு பேசுகின்ற முதல் நிகழ்ச்சி இது ! நாட்டு மக்களுடைய நலன் காக்கும் நிகழ்ச்சி ! நாட்டு மக்களுடைய நலன்தான், என்னுடைய நலன்!

இன்றைக்கு இந்த “நலம் காக்கும் ஸ்டாலின்" திட்டத்தின் மூலமாக, அனைத்து அமைச்சர்களும் மருத்துவம் மற்றும் மக்கள் நல்வாழ்வுத்துறை அமைச்சர்களாக மாறி அவர்களுடைய மாவட்டத்தில் முகாம்கள் தொடங்கியிருக்கிறார்கள்.