ઓગસ્ટમાં GST કલેક્શન 11 ટકા વધી ₹1.59 લાખ કરોડ

વૃધ્ધિ:માર્ચ, 2024માં પૂરાં થતાં નાણાં વર્ષમાં સરકારની જીએસટી દ્વારા કુલ 79.50 લાખ કરોડનું કલેક્શન કરવાની અપેક્ષા

- 

કર નિયમોના પાલનમાં થયેલાં વધારા તથા કરચોરીમાં ઘટાડાને પગલે ઓગસ્ટ મહિનામાં ગુડ્સ એન્ડ સર્વિસિસ ટેક્સ(જીએસટી) કલેક્શન વાર્ષિક ધોરણે 11 ટકાનો વધી 1.59 લાખ કરોડ નોંધાયું છે. આ અંગે માહિતી આપતા રેવન્યુ સેક્રેટરી સંજય મલ્હોત્રાએ જણાવ્યું હતું કે ઓગસ્ટ, 2023માં જીએસટી કલેક્શન  ₹1,59,069 લાખ કરોડ નોંધાયું હતું, જે ઓગસ્ટ, 2022માં 1,43,612 કરોડ રહેવા પામ્યું હતું.

ઓગસ્ટ, 2023માં જીએસટીની કુલ આવકમાં સેન્ટ્રલ જીએસટીના 7 ₹28,328 કરોડ, સ્ટેટ જીએસટીના  ₹35,794 કરોડ, ઈન્ટિગ્રેટેડ જીએસટી ના  ₹83,251 કરોડ (માલ-સામાનની આયાત પર વસૂલાયેલા  ₹43,550 કરોડ સહિત) તથા સેસ પેટે વસૂલવામાં આવેલા  ₹11,695 કરોડ (માલ-સામાનની આયાત પર વસૂલાયેલા ₹1,016 કરોડ સહિત)નો સમાવેશ થાય છે.

ઉલ્લેખનીય છે કે માર્ચ, 2024માં પૂરાં થતાં નાણાકીય વર્ષ દરમિયાન સરકાર જીએસટી દ્વારા કુલ  ₹9.50 લાખ કરોડનું કલેક્શન કરવાની અપેક્ષા ધરાવે છે.