Volhoubaarheid begin by jou plaashek

Klerksdorp Midweek, Klerksdorp - RPO Noordwes het sy jaarlikse kongres verlede week by Senwes aangebied.

- 

Die Barn-lokaal was volgepak met produsente, bedryfsleiers en vennote op Woensdag 15 April.Die Rooivleis Produsente Organisasie (RPO) het die mees dringende uitdagings in die rooivleisbedryf aangespreek, met 'n sterk fokus op volhoubaarheid, biosekuriteit en selfstandige optrede.

Nico Kilian, voorsitter van RPO Noordwes, het tydens die lewering van sy voorsittersverslag uitgelig dat rooivleisprodusente nie alles kan beheer nie maar wel dit wat saak maak, die gehalte van hulle produk. Kilian het gesê as ons nie ons vleisgehalte deurlopend verbeter nie, produsente daardie ekstra rand of twee per kilogram gaan verloor en dit is juis waar die wins lê.

Dr Frikkie Maré, hoofuitvoerende beampte van die Nasionale RPO, het vanuit 'n nasionale perspektief gepraat oor die uitdagings en rigting van die bedryf. Hy het gesê dat die bedryf nie kan bekostig om reaktief te wees nie en dat ons moet vooruit dink en saam strategies optree.