Adams ontken bewerings te midde van tussenverkiesing

Voormalige DA-wyksraadslid van Conville, Brendon Adams - alombekend as Stamhoof - word deur lede van sy vorige party beskuldig dat hy besig is met 'n slinkse strategie om die bruin kiesers na die PA nader te hark.

- Michelle Pienaar

Brendon Adams

"Hoe is dit moontlik dat hy presies weet wanneer en waar die beamptes die notices gaan dien? Hy is elke keer daar wanneer dit gebeur."

Adams is tans 'n lid van die PA party en op pad na die parlement, waar hy in Maart gaan aansluit. Hy is wel baie aktief op sosiale media en met die tussenverkiesing in New Dawn Park gister, Woensdag 11 Februarie, glo talle dat hy direk 'n hand het in die PA se verkiesingsveldtog wat glo nie altyd so eerbaar is nie.

Op Facebook het 'n groot bom gebars toe dit rugbaar word dat Adams se naam en telefoonnommer gekoppel word aan sowat vyf opslaanhuise wat hy na bewering oor die laaste twee maande by die munisipaliteit as onwettige aanbouings aangemeld het. Die nuutste voorval in Peddie Mullerstraat in Conville het heelwat opskudding veroorsaak.