Unieke klimaat, unieke hops, unieke bier

Mens kan nie anders as om die rye groen hops langs die hoofweg tussen die Oudtshoorn-afdraai en die Outeniquapas te bewonder nie.

- Marguerite van Ginkel

Teen Kersfees moet die hops reeds oor die draad gegroei het. Die plante het net twee maande om tussen 4 tot 8 meter hoog te groei.

Hierdie plante is uniek tot die gebied en vorm die kern van Suid-Afrika se bierbedryf.In die hart van Waboomskraal lê 'n besondere vallei met 'n ideale klimaat wat maak dat Waboomskraal en sekere dele in en rondom George die enigste gebiede suid van die ewenaar in Afrika is waar hops suksesvol verbou word. Dit is ook hier waar deur SA Brouery (SAB) sy kernproduk vandaan kry.

Om meer te leer oor hierdie unieke boerdery, het ons by Dean Barnard van Oppie Plaas in Waboomskraal gaan aanklop. Barnard het op die plaas grootgeword en is 'n tweede generasie hopsboer. Sy pa, Deon, het reeds in 1983 begin hops plant, in 'n tyd toe daar sowat 23 hopsboere in Waboomskraal en George was.

Vandag het die bedryf aansienlik gekrimp, met slegs sewe privaat boere en drie kommersiële plase wat steeds hops verbou, asook 'n paar proefgebiede wat deur Suid-Afrikaanse Brouerye besit en bestuur word.