பயங்கரவாத எதிர்ப்புக் குழுவுக்கான பிரதிநிதிகள் பரிந்துரை

ரிஜிஜு கருத்துக்கு காங்கிரஸ் கண்டனம்

- 

புது தில்லி, மே 19: பயங்கரவாதத்துக்கு எதிராக இந்தியா மேற்கொண்டு வரும் கடுமையான நிலைப்பாட்டை எடுத்துரைக்க வெளிநாடுகளுக்கு அனுப்பப்படும் பிரதிநிதிகள் குழுவில் இடம் பெறும் உறுப்பினர்கள் குறித்து கட்சிகளிடம் பரிந்துரை கேட்கவில்லை என்று மத்திய அமைச்சர் கிரண் ரிஜிஜூ கூறியது முற்றிலும் பொய் என காங்கிரஸ் கண்டனம் தெரிவித்தது.

பஹல்காம் பயங்கரவாத தாக்குதலுக்கு பதிலடியாக பாகிஸ்தானின் 9 இடங்களில் உள்ள பயங்கரவாத முகாம்களை ஆபரேஷன் சிந்தூர் நடவடிக்கையின்கீழ் இந்தியா மே 7-ஆம் தேதி அழித்தது.

இதைத்தொடர்ந்து இரு நாடுகளுக்கிடையே சண்டை தீவிரம் அடைந்த நிலையில் அதை நிறுத்திக்கொள்வதாக இருநாடுகளும் 10-ஆம் தேதி அறிவித்தன.

இருப்பினும், பயங்கரவாத செயல்களுக்கு பாகிஸ்தான் அளிக்கும் ஆதரவையும் அதற்கு எதிரான இந்தியாவின் நிலைப்பாட்டையும் வெளிநாடுகளுக்கு எடுத்துரைக்க மத்திய அரசு முடிவு செய்துள்ளது.

இதற்காக 7 எம்.பி.க்கள் தலைமையில் அனைத்துக் கட்சிகளைச் சேர்ந்த 51 பேரை 32 நாடுகளுக்கும், ஐரோப்பிய யூனியனுக்கும் மத்திய அரசு அனுப்பவுள்ளது.

இதில் ஆளும் தேசிய ஜனநாயக கூட்டணியைச் சேர்ந்த 31 பேரும், பிற கட்சிகளைச் சேர்ந்த 20 பேரும் இடம்பெற்றுள்ளனர்.