சமாஜவாதி தலைவர் கருத்தால் சர்ச்சை

'விங் கமாண்டர் வியோமிகா சிங் ராஜபுத்திர சமூகத்தைச் சேர்ந்தவர் என்பதால் அவரை பாஜகவினர் விமர்சிக்க வில்லை' என்று உத்தர பிரதேசத்தைச் சேர்ந்த சமாஜவாதி தேசிய பொதுச் செயலர் ராம்கோபால் யாதவ் பேசியது புதிய சர்ச்சையை ஏற்படுத்தியது.

- 

லக்னெள, மே 15:

ஏற்கெனவே, கர்னல் சோஃபியா குரேஷி குறித்து மத்திய பிரதேச பாஜக அமைச்சர் விஜய் ஷா சர்ச்சைக்குரிய கருத்துக்கு உச்சநீதிமன்றம் கண்டனம் தெரிவித்த நிலையில், இப்போது விங் கமாண்டர் வியோமிகா சிங்கின் ஜாதி குறித்து சமாஜவாதி தலைவர் பேசியது சர்ச்சையை ஏற்படுத்தியது.

'ஆபரேஷன் சிந்தூர்' நடவடிக்கைக்குப் பிறகு, இந்தியா-பாகிஸ்தான் இடையிலான தாக்குதல்கள் தொடர்பான அதிகாரபூர்வ விவரங்களை புது தில்லியில் நடைபெற்ற தொடர் பத்திரிகையாளர் சந்திப்புகளில் விளக்கியதில் விமானப்படையின் விங் கமாண்டர் வியோமிகா சிங், ராணுவ கர்னல் சோஃபியா குரேஷி ஆகியோர் முக்கியப் பங்கு வகித்தனர்.