ஒடிஸா: மர்ம நபர்களால் 15 வயது சிறுமி தீ வைத்து எரிப்பு

உயிருக்கு ஆபத்தான நிலையில் சிகிச்சை

- 

புவனேசுவரம், ஜூலை 19: ஒடிஸாவின் புரி மாவட்டத்தில் அடையாளம் தெரியாத இளைஞர்கள் சிலரால் தீ வைத்து எரிக்கப்பட்ட 15 வயது சிறுமி, புவனேசுவரம் எய்ம்ஸ் மருத்துவமனையில் 70 சதவீத தீக்காயங்களுடன் உயிருக்கு ஆபத்தான நிலையில் சிகிச்சை பெற்று வருகிறார்.

புரி மாவட்டம், பாலாங்கா காவல் நிலைய எல்லைக்குள்பட்ட பயாபார் கிராமம் அருகே பார்கவி ஆற்றங்கரையில் சனிக்கிழமை காலை 9 மணியளவில் இந்த சம்பவம் நடந்துள்ளது. சிறுமி தனது தோழியின் வீட்டிலிருந்து திரும்பி வந்து கொண்டிருந்தபோது, இரு சக்கர வாகனங்களில் வந்த 3 இளைஞர்கள் அவரை இடைமறித்து, ஆற்றங்கரைக்கு வலுக்கட்டாயமாக இழுத்துச் சென்றனர். சிறுமியின் உடல் மீது எரிபொருளை ஊற்றி தீ வைத்த இளைஞர்கள், சம்பவ இடத்தைவிட்டு தப்பியோடினர்.