திமுக கூட்டணியை வீழ்த்துவோம்

தமிழகத்தில் அடுத்த ஆண்டு நடைபெறவுள்ள சட்டப்பேரவைத் தேர்தலில் திமுக கூட்டணியை வீழ்த்தி, தேசிய ஜனநாயக கூட்டணி ஆட்சி அமைக்கும் என்றார் மத்திய உள்துறை அமைச்சர் அமித்ஷா.

- 

திருநெல்வேலி, ஆக. 22:

பாஜக வாக்குச்சாவடி பொறுப்பாளர்களின் முதல் மண்டல மாநாடு, திருநெல்வேலி தச்சநல்லார் அருகே வெள்ளிக்கிழமை நடைபெற்றது. இதில், மத்திய அமைச்சர் அமித்ஷா கலந்து கொண்டு பேசியதாவது: புண்ணிய பூமியான தமிழ் மண்ணில் தமிழ் மொழியில் பேச முடியாதது வருத்தமளிக்கிறது. இந்த தமிழ் மண் சரித்திரம், வீரம், பண்பாடு, கலாசாரம் மிகுந்தது. இந்த மண்ணை வணங்குகிறேன்.

நாகாலாந்து மாநிலத்தில் ஆளுநராகப் பணியாற்றி மறைந்த இல. கணேசன், தனது வாழ்க்கை முழுவதையும் பாஜகவுக்காக அர்ப்பணித்தவர். அவருக்கு அஞ்சலி செலுத்துகிறேன்.

தமிழகத்தைச் சேர்ந்த சி.பி.ராதாகிருஷ்ணனை குடியரசு துணைத் தலைவர் தேர்தலில் முன்னிறுத்தி பெருமையடையச் செய்துள்ள பிரதமர் மோடி, பாஜக தேசியத் தலைவர் ஜெ.பி.நட்டா அகியோருக்கு நன்றி.

தமிழரான விஞ்ஞானி அப்துல் கலாமை குடியரசுத் தலைவராக உயர்த்தியதும் தேசிய ஜனநாயகக் கூட்டணிதான். தமிழ் மண்ணின் பெருமையையும், தமிழ் மக்களின் உணர்வுகளையும் உணர்ந்தவராக பிரதமர் மோடி திகழ்கிறார். கங்கை கொண்ட சோழபுரத்தில் ராஜேந்திர சோழனுக்கு சிலை நிறுவ உத்தரவிட்டுள்ளதோடு, கங்கை நீரால் பிரகஸ்வரருக்கு மீண்டும் அபிஷேகம் செய்து புதிய சரித்திரம் படைத்துள்ளார்.