அமராவதி அணையில் இருந்து உபரி நீர் வெளியேற்றம்

தமிழக-கேரள எல்லையில் கனமழை பெய்து வருவதால் உடுமலை அருகே உள்ள அமராவதி அணையில் இருந்து 3 ஆயிரம் கன அடி உபரி நீர் வெளியேற்றப்பட்டது.

- 

உடுமலை, ஜூலை 25:

உடுமலையை அடுத்துள்ள அமராவதி அணையின் மூலம் திருப்பூர், கரூர் மாவட்டங்களில் சுமார் 55 ஆயிரம் ஏக்கர் பாசன நிலங்கள் பயன்பெற்று வருகின்றன. மேலும் நூற்றுக்கணக்கான கரையோர கிராமங்களுக்கு குடிநீர் ஆதாரமாகவும் இந்த அணை விளங்கி வருகின்றது.

இந்நிலையில் ஆண்டுதோறும் தென்மேற்குப் பருவமழை தொடங்கும்போது அமராவதி அணைக்கு நீர்வரத்து அதிகரிக்கும். தற்போது அமராவதி அணையின் நீர்ப்பிடிப்பு பகுதிகளான மறையூர், கோவில்கடவு, காந்தலூர் ஆகிய பகுதிகளில் பெய்து வரும் தொடர் மழையால் அமராவதி அணைக்கு நீர்வரத்து அதிகரித்து வருகிறது.