தேர்தல் பட்ஜெட் அல்ல!

தமிழக அரசின் 2025-26-ஆம் நிதியாண்டுக்கான நிதிநிலை அறிக்கையில், பொருளாதார ஆய்வறிக்கையில் குறிப்பிட்டவாறே மகளிருக்கான சமூகநலத் திட்டங்கள் மற்றும் கல்வித் துறைக்கு முக்கியத்துவம் அளிக்கப்பட்டிருக்கிறது.

- 

பள்ளிக் கல்விக்கு ரூ.46,767 கோடியும், உயர் கல்விக்கு ரூ.8,494 கோடியும் என ரூ.55,261 கோடி ஒதுக்கீடு செய்யப்பட்டிருக்கிறது.

நடப்பு 2024-25ஆம் நிதியாண்டுக்கு பள்ளிக் கல்வித் துறைக்கு ரூ.44,042 கோடி ஒதுக்கப்பட்டிருந்த நிலையில், அடுத்த நிதியாண்டுக்கு சுமார் ரூ.2,500 கோடி அதிகரிக்கப்பட்டிருக்கிறது.

மும்மொழிக் கொள்கையை உள்ளடக்கிய தேசிய கல்விக் கொள்கை தொடர்பாக மத்திய அரசுக்கும் தமிழக அரசுக்கும் கருத்து மோதல்கள் எழுந்துள்ள நிலையில், கல்வித் துறைக்கு தமிழக நிதி நிலை அறிக்கையில் நிதி ஒதுக்கீடு அதிகரிக்கப்பட்டிருப்பதில் வியப்பில்லை.

குறிப்பாக, 'பிஎம்ஸ்ரீ' பள்ளிகள் திட்ட ஒப்பந்தத்தில் தமிழக அரசு கையொப்பமிடாததைக் காரணம்காட்டி ஒருங்கிணைந்த பள்ளிக் கல்வித் திட்டத்துக்கான (சமக்ர சிக்ஷா) ரூ.2,152 கோடியை மத்திய அரசு நிறுத்திவைத்திருக்கும் சூழலில், அந்த நிதியை தமிழக அரசே தனது சொந்த நிதியிலிருந்து ஒதுக்கீடு செய்யும் என நிதியமைச்சர் தங்கம் தென்னரசு தெரிவித்திருப்பதன்மூலம் தேசிய கல்விக் கொள்கை விவகாரத்தில் தனது உறுதியை மீண்டும் நிலைநிறுத்தியிருக்கிறது தமிழக அரசு.

கலை, அறிவியல், பொறியியல், வேளாண்மை, மருத்துவம் உள்ளிட்ட அனைத்துக் கல்லூரிகளிலும் பயின்றுவரும் 20 லட்சம் கல்லூரி மாணவர்களுக்கு ரூ.2,000 கோடி ஒதுக்கீட்டில் மடிக்கணினி அல்லது கைக்கணினி அடுத்த இரண்டு ஆண்டுகளில் வழங்கப்படும் என்கிற அறிவிப்பு வரவேற்கத்தக்கது.