பயன்பாட்டுக்கு வந்தது பஞ்சப்பூர் பேருந்து முனையம்

தமிழகத்திலேயே முதலாவதாக முற்றிலும் குளிர்சாதன வசதியுடன் கூடிய திருச்சி பஞ்சப்பூர் ஒருங்கிணைந்த பேருந்து முனையம் புதன்கிழமை முதல் மக்கள் பயன்பாட்டுக்கு வந்தது.

- 

திருச்சி, ஜூலை 16:

திருச்சி-மதுரை தேசிய நெடுஞ்சாலையில் பஞ்சப்பூர் என்ற இடத்தில் சுமார் 40 ஏக்கரில் ரூ.408 கோடியில் கட்டப்பட்டு, 'முத்தமிழறிஞர் கலைஞர் கருணாநிதி ஒருங்கிணைந்த பேருந்து முனையம்' எனப் பெயரிடப்பட்ட இந்தப் பேருந்து முனையத்தை தமிழக முதல்வர் மு.க. ஸ்டாலின் கடந்த மே 9 ஆம் தேதி திறந்து வைத்தார். இருப்பினும் எஞ்சியிருந்த சிறு சிறு வேலைகள் காரணமாக பேருந்து முனையம் செயல்பாட்டுக்கு வராமல் இருந்தது.

இந்நிலையில் இந்தப் பேருந்து முனையத்தின் இயக்கத்தை நகராட்சி நிர்வாகத் துறை அமைச்சர் கே.என். நேரு புதன்கிழமை காலை கொடியசைத்துத் தொடங்கி வைத்தார்.

முதலில் சென்னை கிளாம்பாக்கத்துக்கு செல்லும் பேருந்தையும், பேருந்து முனையத்தின் முதல் தளத்துக்கு எஸ்கலேட்டர் மூலம் சென்று ஸ்ரீரங்கத்துக்குச் செல்லும் நகரப் பேருந்தையும் அவர் தொடங்கிவைத்தார். தொடர்ந்து, பேருந்து முனையத்தின் அனைத்துப் பகுதிகளுக்கும் சென்று பார்வையிட்டார்.

8 நடைமேடைகள்: இதுவரை திருச்சி மத்தியப் பேருந்து நிலையத்தில் இருந்து இயக்கப்பட்ட அனைத்துப் பேருந்துகளும் புதன்கிழமை முதல் ஒருங்கிணைந்த பேருந்து முனையத்தில் இருந்தே புறப்பட்டுச் சென்றன.