கல்லூரிகள் தொடங்கும் விவகாரத்தில் என் கருத்தை திமுகவினர் திரித்துக் கூறுகின்றனர்

இந்து சமய அறநிலையத் துறை மூலம் கல்லூரிகள் தொடங்கும் விவகாரத்தில் என் கருத்தை திமுகவினர் திரித்துக் கூறுகின்றனர் என அதிமுக பொதுச் செயலரும், முன்னாள் முதல்வருமான எடப்பாடி கே.பழனிசாமி குற்றஞ்சாட்டினார்.

- 

விழுப்புரம், ஜூலை 10:

விழுப்புரம் நான்குமுனை சந்திப்புப் பகுதியில் வியாழக்கிழமை மாலை நடைபெற்ற மக்களைக் காப்போம் - தமிழகத்தை மீட்போம் பிரசாரப் பயணத்தில் பங்கேற்று, அவர் மேலும் பேசியது:

தமிழகத்தில் ஸ்டாலின் தலைமையிலான கடந்த நான்கரை ஆண்டுகால திமுக ஆட்சியில் மக்கள்பட்ட துன்பங்கள் ஏராளம். கல்லூரிகள் தொடங்குவதில் எந்தவித மாற்றுக் கருத்தும் இல்லை. இந்து சமய அறநிலையத் துறை நிதியிலிருந்து தொடங்குவதைத்தான் வேண்டாம் என்கிறோம்.

இந்து சமய அறநிலையத் துறை மூலமாக தொடங்கப்பட்ட கல்லூரிகளுக்கு நிறைய கட்டடங்கள் கட்ட வேண்டிய நிலை இருக்கும். புதிய படிப்புகளைத் தொடங்க வேண்டிய நிலை ஏற்படும். இவற்றை இந்து சமய அறநிலையத் துறை நிதியிலிருந்து மேற்கொள்ள முடியாது. இந்தக் கல்லூரிகளில் படிக்கும் மாணவர்களுக்கு அரசால் முழுமையாக எந்தவித நன்மையையும் செய்ய முடியாது.