மண்டல-மகரவிளக்கு பூஜை: சபரிமலை கோயில்நடை இன்று திறப்பு

பிரசித்தி பெற்ற சபரிமலை ஐயப்பன் கோயிலில் வருடாந்திர மண்டல-மகரவிளக்கு பூஜை யாத்திரைக்காக ஞாயிற்றுக்கிழமை (நவ. 16) மாலை 5 மணிக்கு நடை திறக்கப்பட உள்ளது.

- 

கேரள மாநிலம், பத்தனம்திட்டா மாவட்டத்தில் அமைந்த சபரிமலை ஐயப்பன் கோயிலின் இரண்டு மாத கால மண்டல-மகரவிளக்கு பூஜை யாத்திரையின்போது, லட்சக்கணக்கான உள்நாட்டு மற்றும் வெளிநாட்டு பக்தர்கள் தரிசனம் செய்வார்கள். நிகழாண்டு யாத்திரைக்காக சபரிமலை ஐயப்பன் கோயில் நடை ஞாயிற்றுக்கிழமை திறக்கப்படுகிறது.

தற்போதைய மேல்சாந்தி அருண் குமார் நம்பூதிரி, தந்திரி மகேஷ் மோகனரு முன்னிலையில் மாலை 5 மணிக்கு கோயில் நடையைத் திறந்து வைக்கிறார். நடை திறக்கப்பட்டதும், மேல்சாந்தி அருண் குமார் நம்பூதிரி பதினெட்டாம்படியிறங்கி, அணையாத விளக்கை ஏற்றுவார்.

பதினெட்டாம்படிக்குக் கீழே காத்திருக்கும் புதிய மேல்சாந்திகளான பிரசாத் நம்பூதிரி (சபரிமலை), மனு நம்பூதிரி (மாளிகைப்புரம்) ஆகியோரை, இருமுடிக் கட்டுடன் அவர் சந்நிதானத்துக்கு அழைத்துச் செல்வார்.