புதிய கல்லூரிகள் - கவனம் வேண்டும்

ஓட்டுமொத்த அளவில் உயர்கல்வி சேர்க்கையில் 47 சதவீதத்துடன் தமிழகம் முதலிடத்தில் உள்ளது என்பது பெருமைக்குரிய ஒன்றாகும்.

- பெ. சுப்ரமணியன்

இதைத் தக்கவைக்கவும் அதிகரிக்கவும் பல்வேறு நடவடிக்கைகளை அரசு எடுத்து வருகிறது. இந்த நிலைக்கு அரசின் பல்வேறு திட்டங்கள் மட்டுமின்றி, மக்கள் மத்தியில் உயர் கல்வி குறித்த விழிப்புணர்வு மேம்பட்டிருக்கிறது என்பதும் காரணம்.

பிளஸ் 2 முடித்து உயர் கல்வியில் சேர்க்கை பெறும் மாணவர்களின் எண்ணிக்கை 2021-22-ஆம் கல்வியாண்டில் 45 சதவீதமாக இருந்தது; இது 2023-24-ஆம் கல்வியாண்டில் 74 சதவீதமாக அதிகரித்துள்ளது.

தமிழகத்தில் 165 அரசு கலை, அறிவியல் கல்லூரிகளில் 159 பாடப்பிரிவுகள் பயிற்றுவிக்கப்படுகின்றன. பெரும்பாலான கல்லூரிகள் நகர்ப்புறங்களில் அமைந்திருந்தாலும் அந்தக் கல்லூரிகளில் படிக்கும் அதிகப்படியான மாணவர்கள் கிராமப்புறங்களைச் சேர்ந்த ஏழை, நடுத்தர வகுப்பைச் சேர்ந்தவர்கள். ஆனால், ஆண்டுதோறும் உயர் கல்வியில் இடைநிற்றல் அதிகரித்து வருவது வருந்தத்தக்கது.

இந்த நிலையில், உயர்கல்வி சேர்க்கையை மேம்படுத்தும் நோக்கில் 2025-26-ஆம் ஆண்டுக்கான உயர்கல்வித் துறை மானியக் கோரிக்கையில் தமிழகத்தில் 11 புதிய கல்லூரிகள் தொடங்கப்படும் என அறிவிக்கப்பட்டது. அதைத் தொடர்ந்து கடலூர் மாவட்டம் பண்ருட்டியில் அரசு கல்லூரி அமைக்கப்படும் என அறிவிக்கப்பட்டது. பண்ருட்டி, குன்னூர், நத்தம், ஆலந்தூர், விக்கிரவாண்டி, செய்யூர், மானாமதுரை, முத்துப்பேட்டை, திருவிடைமருதூர், கொளக்காநத்தம், ஓட்டப்பிடாரம் ஆகிய ஊர்களில் புதிய கல்லூரிகள் தொடங்கப்பட்டுள்ளன.