காசம்பட்டி பல்லுயிர் பாரம்பரியத் தலம்: வனத் துறை உயரதிகாரிகள் குழு ஆய்வு

நத்தம் அருகேயுள்ள காசம்பட்டி பல்லுயிர் பாரம்பரியத் தலத்தை தமிழ்நாடு பல்லுயிர் வகைமை வாரியச் செயலரும், முதன்மை தலைமை வனப் பாதுகாவலருமான விஜேந்திர சிங் மாலிக் தலைமையிலான குழுவினர் புதன்கிழமை ஆய்வு செய்தனர்.

- 

நத்தம்/மதுரை, ஏப். 9:

திண்டுக்கல் மாவட்டம், நத்தம் அருகே காசம்பட்டியில் உள்ள வீரகோவில் உள்ளடங்கிய 4.97 ஹெக்டேர் பகுதியை பல்லுயிர் பாரம்பரியத் தலமாக தமிழக அரசு அறிவித்தது. இதற்கு அந்தப் பகுதி கிராம மக்கள் கடும் எதிர்ப்புத் தெரிவித்து வருகின்றனர்.

இந்த நிலையில், தமிழ்நாடு பல்லுயிர் வகைமை வாரியச் செயலரும், முதன்மை தலைமை வனப் பாதுகாவலருமான விஜேந்திர சிங் மாலிக் தலைமையில் திண்டுக்கல் மாவட்ட வன ராஜ்குமார், அழகர்கோவில் வனச் சரக அலுவலர் குமார், வனவர் மகேந்திரன், வனத் துறையினர் உள்ளிட்டோர் காசம்பட்டி பல்லுயிர் பாரம்பரியத் தலத்தை ஆய்வு செய்தனர்.

அப்போது, பல்லுயிர் பாரம்பரியத் தலமாக அறிவிக்கப்பட்ட இடத்தில் அமைந்துள்ள வீரகோவில் பகுதிக்குச் சென்று பார்வையிட்ட பிறகு, அங்கிருந்த பொது மக்களிடம் இந்தக் குழுவினர் கருத்துகளைக் கேட்டறிந்தனர்.