உண்மை கண்டறியும் குழு ஆய்வு; புதிய ‘கேட் கீப்பர்’ நியமனம்

கடலூர் செம்மங்குப்பம் அருகே கடவுப்பாதைக் கடக்க முயன்ற பள்ளி வேன் மீது பயணிகள் ரயில் மோதி நிகழ்ந்த விபத்து தொடர்பாக, ரயில்வே கேட் பகுதியில் தெற்கு ரயில்வே உண்மை கண்டறியும் குழுவினர் புதன்கிழமை ஆய்வு செய்தனர்.

- 

நெய்வேலி, ஜூலை 9:

கடலூரை அடுத்த செம்மங்குப்பம் ரயில்வே கடவுப் பாதையை கடலூர் மருதாடு பகுதியில் இயங்கும் தனியார் சிபிஎஸ்இ பள்ளி வேன் செவ்வாய்க்கிழமை கடக்க முயன்ற போது, சிதம்பரம் நோக்கிச் சென்ற பயணிகள் ரயில் மோதியது. இந்த விபத்தில் சுப்பிரமணியபுரத்தைச் சேர்ந்த திராவிடமணியின் மகள் சாருமதி (16), மகன் செழியன் (15), தொண்டமாநத்தம் கிராமத்தைச் சேர்ந்த விஜயசந்திரகுமார் மகன் நிமிலேஷ் (12) ஆகியோர் உயிரிழந்தனர். மேலும், நிமிலேஷின் சகோதரரான விஷ்வேஸ் (16), வேன் ஓட்டுநர் சங்கர் (47) மற்றும் விபத்தின் போது மின்சாரம் பாய்ந்த செம்மங்குப்பம் பகுதியைச் சேர்ந்த அண்ணாதுரை (55) ஆகியோர் காயமடைந்தனர்.