முதல்வர் - எதிர்க்கட்சித் தலைவர் கடும் மோதல்

சட்டம்- ஒழுங்கு விவகாரத்தை பேரவையில் பேசுவது தொடர்பாக முதல்வர் மு.க.ஸ்டாலின், எதிர்க்கட்சித் தலைவர் எடப்பாடி கே.பழனிசாமி ஆகியோர் இடையே கடும் வார்த்தைப் போர் ஏற்பட்டது.

- 

சென்னை, மார்ச் 20: இதைத் தொடர்ந்து ஏற்பட்ட கூச்சல், குழப்பத்துக்கு இடையே அதிமுக உறுப்பினர்கள் வெளிநடப்பு செய்தனர்.

சட்டப் பேரவையில் வியாழக்கிழமை கேள்வி நேரம் முடிந்ததும் நேரமில்லாத நேரத்தில் எதிர்க்கட்சித் தலைவர் எடப்பாடி கே.பழனிசாமி தமிழக சட்டம்-ஒழுங்கு பிரச்னை குறித்துப் பேச முயன்றார். அப்போது நடைபெற்ற விவாதம்:

பேரவைத்தலைவர் மு.அப்பாவு: இன்றும், நாளையும் இதுபோன்ற விவாதங்களை எழுப்ப வேண்டாம் என நினைக்கிறேன். நேரமில்லாத நேரத்தில் பிரச்னைகளை எழுப்புவது தொடர்பாக அரைமணி நேரத்துக்கு முன்பாக என்னிடம் தகவல் தெரிவிக்க வேண்டும். உங்கள் கட்சி கொறடா என்னை 20 நிமிஷங்களுக்கு முன்புதான் சந்தித்தார். ஆனாலும், நீங்கள் பேசுவதற்கு அனுமதிக்கிறேன்.

எடப்பாடி கே.பழனிசாமி: தமிழகத்தில் ஒரே நாளில் நான்கு இடங்களில் கொலைச் சம்பவங்கள் நடந்துள்ளன. அது குறித்துப் பேச வேண்டியுள்ளது.

அவை முன்னவர் துரைமுருகன்: இதுபோன்ற பிரச்னைகள் குறித்துப் பேசுவதற்கு முன்கூட்டியே தகவல் தெரிவித்திருக்க வேண்டும். அப்போதுதான் அமைச்சர்கள் தங்கள் துறைகளிடமிருந்து பதில்களைப் பெற்று பேரவைக்குத் தெரிவிக்க முடியும். இதுதான் முறை. அந்த மரபை மீறக் கூடாது.

பேரவைத் தலைவர்: அவை முன்னவர் நியாயமான கருத்தைத் தெரிவித்துள்ளார். நீங்கள் எழுப்பும் பிரச்னை பற்றி பிறகு பேசிக் கொள்ளலாம்.

எடப்பாடி கே.பழனிசாமி: நேரமில்லாத நேரத்தில் முக்கியப் பிரச்னைகள் குறித்துப் பேசி இருக்கிறோம். இதுதான் கடந்த கால வரலாறு. நீங்கள் பழைய பதிவேடுகள் இருந்தால் எடுத்துப் பாருங்கள்.