அமெரிக்காவை மீண்டும் தாக்குவோம்: கமேனி

அமெரிக்கா தங்கள் மீது குண்டுவீசினால் அந்த நாட்டு நிலைகள் மீது தாக்குதல் நடத்துவோம் என்று ஈரான் தலைமை மதகுரு அயதுல்லா கமேனி சூளுரைத்துள்ளார்.

- 

டெஹ்ரான், ஜூன் 26:

இது குறித்து அவர் கூறியதாவது: கத்தாரில் உள்ள அமெரிக்க ராணுவ தளத்தின் மீது ஈரான் எந்த உயிர்ச் சேதமும் இல்லாமல் கடந்த திங்கள்கிழமை ஏவுகணை தாக்குதல் நடத்தியது. இதன்மூலம் அமெரிக்காவுக்கு நெற்றிப் பொட்டில் அறைந்தது போன்ற செய்தியை ஈரான் சொல்லியுள்ளது.

ஈரான் மீது மீண்டும் தாக்குதல் நடத்தினால், அதற்குப் பதிலடியாக மத்திய கிழக்கு பிராந்தியத்தில் உள்ள அமெரிக்காவின் ராணுவ நிலைகளை ஈரான் தாக்கும் என்பதுதான் அந்தச் செய்தி. இந்தப் போரில் ஈரானுக்கு மிகப் பெரிய வெற்றி கிடைத்திருக்கிறது. அமெரிக்காவிடம் ஈரான் ஒருபோதும் சரணடையாது.

ஈரானின் மூன்று அணுசக்தி மையங்கள் மீது தாக்குதல் நடத்தி விட்டு, அவை நிர்மூலமாக்கப்பட்டதாக டிரம்ப் கூறுகிறார். இதன் மூலம் தாக்குதலின் பாதிப்பை அவர் மிகைப்படுத்துகிறார். உண்மையில் அந்தத் தாக்குதல் மூலம் டிரம்ப் எதையுமே சாதிக்கவில்லை.