குறுவை சாகுபடியைத் தொடங்க முடியாமல் விவசாயிகள் தவிப்பு

மேட்டூர் அணை திறக்கப்பட்டு 15 நாள்கள் கடந்துள்ள நிலையில், டெல்டா மாவட்டங்களில் கிளை வாய்க்கால்களில் நீர் வரத்து குறைவாக இருப்பதால், குறுவை சாகுபடியைத் தொடங்க முடியாமல் விவசாயிகள் தவிக்கின்றனர்.

- நமது நிருபர்

தஞ்சாவூர், ஜூன் 28: மேட்டூர் அணை திறக்கப்பட்டு 15 நாள்கள் கடந்துள்ள நிலையில், டெல்டா மாவட்டங்களில் கிளை வாய்க்கால்களில் நீர் வரத்து குறைவாக இருப்பதால், குறுவை சாகுபடியைத் தொடங்க முடியாமல் விவசாயிகள் தவிக்கின்றனர்.

மேட்டூர் அணையில் போதுமான அளவுக்கு நீர் வரத்து இருந்ததால், ஜூன் 12-ஆம் தேதி டெல்டா பாசனத்துக்கு தண்ணீர் திறந்துவிடப்பட்டது. இதைத்தொடர்ந்து கல்லணை 15-ஆம் தேதி திறக்கப்பட்டது.

தொடக்கத்தில் மேட்டூர் அணையிலிருந்து திறந்து விடப்படும் நீரின் அளவு குறைவாக இருந்ததால், கல்லணையிலிருந்து விநாடிக்கு காவிரி, வெண்ணாற்றில் தலா 1,500 கனஅடி வீதமும், கல்லணைக் கால்வாயில் 500 கனஅடி வீதமும், கொள்ளிடத்தில் 400 கனஅடி வீதமும் திறந்துவிடப்பட்டது.

என்றாலும், படிப்படியாக திறந்துவிடப்படும் நீரின் அளவு உயர்த்தப்பட்டாலும், போதுமான அளவுக்கு இல்லாததால், கடைமடைப் பகுதிகளுக்கு தண்ணீர் செல்வது தாமதமானது.