சட்டப்பேரவைத் தேர்தல் கள நிலவரம் பேரூர், ஒன்றிய, நகர நிர்வாகிகளுடன் ஸ்டாலின் ஆலோசனை

தேர்தலை எதிர்கொள்ள சட்டப்பேரவைத் தொகுதிவாரியாக கட்சி நிர்வாகிகளுடன் திமுக தலைவரும் முதல்வருமான மு.க.ஸ்டாலின் ஆலோசனையை வெள்ளிக்கிழமை தொடங்கினார்.

- 

சென்னை, ஜூன் 13:

மாவட்டச் செயலர்கள், தொகுதிப்பொறுப்பாளர்கள், மாவட்ட அமைச்சர்கள் இல்லாமல் அவர்களுக்குக் கீழுள்ள நிர்வாகிகளை அழைத்துப் பேசி தொகுதியின் களநிலவரங்களை அவர் கேட்டறிந்து வருகிறார்.

சட்டப்பேரவைத் தேர்தலில் 200-க்கும் அதிகமான தொகுதிகளில் வெற்றி பெற வேண்டும் என திமுக இலக்கு நிர்ணயித்துள்ளது. இதற்கேற்ற வகையில், சட்டப்பேரவைத் தொகுதிகளின் கள நிலவரத்தை அறிய முதல்வர் ஸ்டாலின் முடிவு செய்துள்ளார்.

அதன்படி, தொகுதிவாரியாக ஆலோசனை நடத்துவதற்கான அறிவிப்பு வெளியிடப்பட்டது.

‘உடன்பிறப்பே வா’ என்ற தலைப்பிலான ஆலோசனைக் கூட்டம் அறிவிக்கப்பட்டு, முதல் நிகழ்வு அண்ணா அறிவாலயத்தில் வெள்ளிக்கிழமை நடைபெற்றது.

தனித்தனியாக ஆலோசனை: கட்சி நிர்வாகிகளுடன் ஆலோசிக்கும் முதல் நாள் கூட்டத்தில், சிதம்பரம், விழுப்புரம் மற்றும் உசிலம்பட்டி தொகுதிகளைச் சேர்ந்த நிர்வாகிகளுக்கு அழைப்பு விடுக்கப்பட்டிருந்தது.