சோஃபியா, ஒசாகா முன்னேற்றம்

மியாமி கார்டன்ஸ், மார்ச் 19: ஆடவர் மற்றும் மகளிருக்கான 1000 புள்ளிகள் கொண்ட மியாமி ஓபன் டென்னிஸ் போட்டி, அமெரிக்காவில் புதன்கிழமை தொடங்கியது. முதல் சுற்றில் உள்நாட்டு வீராங்கனை சோஃபியா கெனின், ஜப்பானின் நவோமி ஒசாகா உள்ளிட்டோர் வெற்றி பெற்றனர்.

- 

மகளிர் ஒற்றையர் பிரிவு முதல் சுற்றில், ஆஸ்திரேலிய ஓபன் முன்னாள் சாம்பியனான சோஃபியா கெனின் 6-4, 7-5 என்ற நேர் செட்களில், இருமுறை விம்பிள்டன் சாம்பியனான பெட்ரா குவிட்டோவாவை வீழ்த்தினார். அடுத்த சுற்றில் அவருக்கான சவாலாக, சக அமெரிக்கரும், யுஎஸ் ஓபன் முன்னாள் சாம்பியனுமான கோகோ கௌஃபை சந்திக்கிறார்.

இருமுறை கிராண்ட்ஸ்லாம் சாம்பியனான ஜப்பானின் நவோமி ஒசாகா 3-6, 6-4, 6-3 என்ற கணக்கில் உக்ரைனின் யுலியா ஸ்டாரோடுப்சேவாவை சாய்த்தார். அவர் அடுத்ததாக, போட்டித்தரவரிசையில் 24-ஆம் இடத்திலிருக்கும் ரஷியாவின் லுட்மிலா சாம்சோனோவாவை சந்திக்கிறார்.

உள்நாட்டு வீராங்கனைகள் வரிசையில், ஆஷ்லின் குரூகர் 6-3, 6-2 என்ற நேர் செட்களில் மெக்ஸிகோவின் ரெனடா ஜராஜுவாவையும், ஹேலி பாப்டிஸ்டே 6-3, 6-7 (5/7), 6-1 என்ற கணக்கில் செர்பியாவின் ஓல்கா டேனிலோவிச்சையும் சாய்த்தனர்.