மணிப்பூர் நிலவரம்: அமித் ஷா ஆய்வு

வன்முறையால் பாதிக்கப்பட்ட மணிப்பூரில் பாதுகாப்பு நிலவரம் குறித்து மத்திய உள்துறை அமைச்சர் அமித் ஷா சனிக்கிழமை ஆய்வு மேற்கொண்டார்.

- 

புது தில்லி, மார்ச் 1:

அப்போது, மாநிலத்தின் பல்வேறு குழுக்கள் சட்டவிரோத ஆயுதங்களை அரசிடம் ஒப்படைக்கச் செய்வதிலும், மாநிலத்தில் இயல்பு நிலையை மீட்டெடுப்பதிலும் கவனம் செலுத்துமாறு அதிகாரிகளை அவர் அறிவுறுத்தினார்.

மணிப்பூரில் குடியரசுத் தலைவர் ஆட்சி அமலுக்கு வந்த பிறகு, நடைபெற்றுள்ள முதல் ஆய்வுக் கூட்டம் இதுவாகும்.

மணிப்பூரில் பெரும்பான்மையாக உள்ள மைதேயி சமூகத்தினருக்கும், குகி பழங்குடியினருக்கும் இடையே கடந்த 2023, மே மாதம் பெரும் கலவரம் மூண்டது. இதில் ஏராளமான வீடுகள் தீக்கிரையாகப்பட்டன. கலவரத்துக்குப் பிறகு அவ்வப்போது நிகழும் வன்முறைச் சம்பவங்களில் இதுவரை 250-க்கும் மேற்பட்டோர் உயிரிழந்துவிட்டனர். வீடிழந்த ஆயிரக்கணக்கானோர் நிவாரண முகாம்களில் தங்கியுள்ளனர். கலவரம் மற்றும் வன்முறை சம்பவங்களின்போது காவல் துறை, பாதுகாப்புப் படையினரிடம் இருந்து ஏராளமான ஆயுதங்கள் கொள்ளையடிக்கப்பட்டன.