எண்ம வியூகம்!

அடுக்கு மொழிகள், அலங்கார மேடைகள், வானுயர்ந்த கட்-அவுட்கள், வகை வகையான வண்ணச் சுவரொட்டிகள் இவை யாவும் பழைய அரசியல் களத்தின் சிதைந்த எச்சங்கள். இப்போதோ இணைய வழியில் சமூக ஊடகங்களே நவீன அரசியலின் புதிய சிம்மாசனமாக மாறியுள்ளன. அதிலும் குறிப்பாக, தனி மனிதனின் அறிதிறன்பேசியே இன்றைய அரசியல் போர்க்களத்தின் அதிமுக்கிய ஆயுதம்.

- பழ. அசோக்குமார்

சமூக ஊடகங்களின் வளர்ச்சிக்குப் பிறகு, அரசியல் கூட்டங்களுக்குத் திரண்டு வரும் தொண்டர்கள் இனி தேவை இல்லை. ‘ஃபாலோயர்கள்' (பின்பற்றுபவர்கள்) என்று சொல்லக்கூடிய இணைய செல்வாக்கு மட்டுமே போதுமானது; அரசியல் சந்தை அமோகமான வணிகச் சலசலப்புடன் உச்சம் தொடும்.

அரசியல் தலைவர்கள் ஓர் அறிக்கையை வெளியிட, சமூக ஊடகத்தில் சிறு பதிவிட்டால் போதும், அடுத்த விநாடியே அது லட்சக்கணக்கான மக்களை மின்னல் வேகத்தில் சென்றடைந்து விடுகிறது. சில தலைவர்கள் தங்கள் அறைக்குள் இருந்து கொண்டே சமூக ஊடகங்களில் அடிக்கடி நேரடியாகக் காட்சியளித்து உரையாற்றுகிறார்கள். அவர்கள் மேல்மட்டத் தலைவர்கள் முதல் கடைக்கோடித் தொண்டர்கள் வரை அனைவரிடமும் ஆலோசனை நடத்துகிறார்கள்.

தலைவர்கள் இப்போது வெறும் அரசியல்வாதிகள் அல்லர்; அவர்கள்தாம் அந்தந்தக் கட்சிகளின் விளம்பரத் தூதர்கள். ஆரோக்கியக் குறிப்புகள், வாகன விபத்தில் சிக்கியவரை மீட்க நீளும் உதவிக்கரங்கள், பொது மக்களுடன் ஒருவராகத் தேநீர் அருந்தும் எளிய காட்சிகள், பண்டிகைக்குப் பகிரப்படும் அழகான வாழ்த்துச் செய்திகள் ... இவை அனைத்தும் எதற்காகத் தெரியுமா? ஓர் எளிய, நெருக்கமான பிம்பத்தைக் கட்டமைக்கத்தான். இந்த எண்ம (டிஜிட்டல்) அலங்காரம்தான் இப்போது தலைவர்களுக்கான பிரம்மாண்டமான ஒப்பனையாகிவிட்டது.