கடின உழைப்பு, விடாமுயற்சி இருந்தால் சாதிக்கலாம்...

“தாரண கல்லைச் செதுக்கச் செதுக்கவே அது சிற்பமாகும். அதேபோல மாணவர்களும். சரியான முறையில் அவர்களைச் செதுக்கினால்தான் எதிர்காலத்தில் சிறந்து விளங்க முடியும். மனிதன் சாதிப்பதற்குப் பணமோ, படிப்போ, குடும்பச் சூழலோ தடையாக இருக்க முடியாது. கடின உழைப்பும், விடாமுயற்சியும் இருந்தால் எதுவும் சாத்தியம்” என்கிறார் அருண்மொழிவர்மன்.

- 

பதினான்கு ஆங்கில நூல்களை எழுதியுள்ளார் திருவாரூரை அடுத்துள்ள கண்கொடுத்தவனிதம் கிராமத்தைச் சேர்ந்த இளைஞர் அருண்மொழிவர்மன். இவரது முதல் நூலுக்கு கனடா பிரதமராக இருந்த ஜஸ்டின் ட்ரூடோ பாராட்டுத் தெரிவித்துள்ளார்.

சாதனை படைத்த அருண்மொழிவர்மனிடம் பேசியபோது:

“எனது சிறுவயதிலேயே அப்பா இறந்துவிட்டார். அம்மாதான் படிக்க வைத்தார். சொந்தமாக இருந்த வயலில் விவசாயம் வாழ்வாதாரத்துக்குக் கை கொடுத்தது. பிளஸ் 2 முடித்தவுடன் சென்னைக்கு வேலைக்குச் சென்றேன். கொஞ்சம் சம்பளம் என்றாலும், பல அனுபவங்கள் கிடைத்தன.

‘படிக்க முடியவில்லை. வாழ்க்கையில் ஏதாவது சாதிக்க வேண்டும்’ என்ற எண்ணம் என்னை உறுதியது. சொந்த நிலத்தில் விவசாயம் செய்து குடும்பத்தைக் காப்பாற்றி விடலாம் என்ற தைரியத்தில் சென்னையை வேலையை விட்டு வந்துவிட்டேன். இடைப்பட்ட காலத்தில் சிதம்பரம் அண்ணாமலைப் பல்கலைக்கழகத்தின் தொலைதூரக் கல்வி முறையில் இளங்கலை, முதுகலை வரலாறு படிப்பை முடித்தேன்.