ஸெலென்ஸ்கிக்கு ஐரோப்பிய நாடுகள் முழு ஆதரவு

ரஷியாவுடனான போர் விவகாரத்தில் அமெரிக்க அதிபர் டொனால்ட் டிரம்ப்புடன் நேரடி காரசார விவாதத்தில் ஈடுபட்ட உக்ரைன் அதிபர் வொலோதிமீர் ஸெலென்ஸ்கிக்கு அவரின் ஐரோப்பிய கூட்டணி நாடுகள் முழுமையான ஆதரவைத் தெரிவித்துள்ளன.

- 

நியூயார்க், மார்ச் 1: ரஷியாவுடனான போர் விவகாரத்தில் அமெரிக்க அதிபர் டொனால்ட் டிரம்ப்புடன் நேரடி காரசார விவாதத்தில் ஈடுபட்ட உக்ரைன் அதிபர் வொலோதிமீர் ஸெலென்ஸ்கிக்கு அவரின் ஐரோப்பிய கூட்டணி நாடுகள் முழுமையான ஆதரவைத் தெரிவித்துள்ளன.

டொனால்ட் டிரம்ப் மற்றும் துணை அதிபர் ஜே.டி. வான்ஸை வாஷிங்டனில் உள்ள வெள்ளை மாளிகையின் ஓவல் அலுவலகத்தில் வெள்ளிக்கிழமை சந்தித்துப் பேசிய ஸெலென்ஸ்கி, அங்கு அவர்களின் காட்டமான விமர்சனத்தை எதிர்கொண்டு பேச்சுவார்த்தையில் இருந்து பாதியிலேயே வெளியேறினார்.

பின்னர் இந்த விவகாரம் தொடர்பாக எக்ஸ் ஊடகத்தில் அவர் பதிவு வெளியிட்டார். அந்தப் பதிவில் ஐரோப்பா மற்றும் பிற பகுதிகளைச் சேர்ந்த கூட்டணி நாடுகளின் தலைவர்கள் ஸெலென்ஸ்கிக்கு ஆதரவும் ஆறுதலும் தரும் வகையில் பதிலளித்துள்ளனர்.

இது குறித்து ஐரோப்பிய ஆணைய தலைவர் உர்சுலா வான்டெர் லியன் வெளியிட்டுள்ள பதிலில், 'உங்கள் தன்னம்பிக்கை நிறைந்த நிலைப்பாடு உக்ரைன் மக்களின் வீரத்தை கௌரவப்படுத்தும் வகையில் அமைந்துள்ளது. இதே போல் பயமற்று இருக்கவும். உங்களுடன் நாங்கள் எப்போதும் இருப்போம்' என்று தெரிவித்துள்ளார்.