விமான விபத்து: விஜய் ரூபானியின் உடல் அரசு மரியாதையுடன் தகனம்

119 உடல்கள் அடையாளம் காணப்பட்டன

- 

அகமதாபாத்/ராஜ்கோட், ஜூன் 16: அகமதாபாத் விமான விபத்தில் உயிரிழந்த குஜராத் முன்னாள் முதல்வர் விஜய் ரூபானியின் உடல் ராஜ்கோட்டில் அரசு மரியாதையுடன் தகனம் செய்யப்பட்டது.

வாகனத்தில் கொண்டு செல்லப்பட்ட அவரது உடலுக்கு வழிநெடுகிலும் ஏராளமானோர் கூடி இறுதி அஞ்சலி செலுத்தினர். ரூபானியின் வீட்டில் வைக்கப்பட்டிருந்த உடலுக்கு மத்திய உள்துறை அமைச்சர் அமித் ஷா, மத்திய அமைச்சரும் குஜராத் மாநில பாஜக தலைவருமான சி.ஆர். பாட்டீல், மாநில ஆளுநர் ஆச்சாரியா தேவவிரத், முதல்வர் பூபேந்திர படேல் உள்ளிட்டோர் அஞ்சலி செலுத்தினர்.

முன்னதாக, அகமதாபாத்தில் விஜய் ரூபானியின் உடல் அவரது குடும்பத்தினரிடம் அரசு மரியாதையுடன் ஒப்படைக்கப்பட்டது. பின்னர் அங்கிருந்து ராஜ்கோட்டிற்கு சிறப்பு விமானம் மூலம் அவரது உடல் கொண்டு வரப்பட்டது.

முன்னதாக, விஜய் ரூபானி உள்பட 119 பேரின் உடல்கள் மரபணு (டிஎன்ஏ) பரிசோதனை மூலம் அடையாளம் காணப்பட்டன.