இணையவழி விளையாட்டுகளுக்கு புதிய விதிகள் மத்திய, மாநில அரசுகள் பதிலளிக்க உயர்நீதிமன்றம் உத்தரவு

இணையவழி விளையாட்டுகளுக்கு ஆதார் இணைப்பை கட்டாயமாக்கியும், நேரக் கட்டுப்பாடு விதித்தும் தமிழக அரசு கொண்டுவந்த புதிய விதிகளை எதிர்த்து தொடுக்கப்பட்ட வழக்கில், மத்திய-மாநில அரசுகள் பதிலளிக்க சென்னை உயர்நீதிமன்றம் உத்தரவிட்டது.

- 

சென்னை, பிப். 26:

தமிழகத்தில் இணையவழி விளையாட்டுகளை முறைப்படுத்தும் வகையில் 2022-ஆம் ஆண்டு தமிழ்நாடு இணையவழி சூதாட்ட தடை மற்றும் இணையவழி விளையாட்டுகளுக்கான ஒழுங்கு முறைச் சட்டம் கொண்டு வரப்பட்டது.

இந்த சட்டத்தை எதிர்த்து தாக்கல் செய்யப்பட்ட வழக்குகளை விசாரித்த சென்னை உயர்நீதிமன்றம், தமிழகத்தில் அதிர்ஷ்டத்தை நம்பி விளையாடும் இணையவழி விளையாட்டுகளை தடை செய்தது. செல்லும் என்றும், அதேநேரம் திறமைக்கான இணையவழி விளையாட்டுகளான ரம்மி, போக்கர் போன்ற விளையாட்டுகளை தடை செய்த பிரிவுகளை ரத்து செய்தும் உத்தரவிட்டது.

நேரக்கட்டுப்பாடு விதிப்பு... மேலும், இணையவழி ரம்மி உள்ளிட்ட திறமைக்கான விளையாட்டுகளை விளையாடுவதற்கான வயது, நேரம் உள்ளிட்டவை தொடர்பாக தமிழக அரசு விதிகளை உருவாக்கிக் கொள்ளலாம் எனவும் கடந்த 2023-ஆம் ஆண்டு நவம்பரில் உத்தரவிட்டது.

அதன்படி, இணையவழி விளையாட்டுகளுக்கு ஆதார் இணைப்பை கட்டாயமாக்கியும், நள்ளிரவு 12 மணி முதல் அதிகாலை 5 மணி வரை இணையவழி விளையாட்டுகளை விளையாட முடியாத வகையில் நேரக்கட்டுப்பாடு விதித்தும் தமிழக அரசு புதிதாக விதிகளை வகுத்து பிப்.14-ஆம் தேதி அரசிதழில் வெளியிட்டது.