சி.பி.ராதாகிருஷ்ணன் பதவியேற்பு

15-ஆவது குடியரசு துணைத் தலைவரானார்

- 

புது தில்லி, செப். 12: நாட்டின் 15-ஆவது குடியரசு துணைத் தலைவராக தமிழகத்தைச் சேர்ந்த சி.பி. ராதாகிருஷ்ணன் (67) வெள்ளிக்கிழமை பதவியேற்றார்.

குடியரசுத் தலைவர் மாளிகையில் காலை 10 மணிக்கு நடைபெற்ற விழாவில், குடியரசுத் தலைவர் திரௌபதி முர்மு அவருக்கு பதவிப் பிரமாணம் செய்து வைத்தார். அப்போது, சி.பி.ராதாகிருஷ்ணன் கடவுளின் பெயரில் என்று கூறி ஆங்கிலத்தில் உறுதிமொழி ஏற்றார். பதவியேற்புக்குப் பிறகு அவருக்கு குடியரசுத் தலைவர் வாழ்த்து தெரிவித்தார்.

பதவியேற்பு விழாவில் பிரதமர் நரேந்திர மோடி, மத்திய உள்துறை அமைச்சர் அமித் ஷா, பாதுகாப்புத் துறை அமைச்சர் ராஜ்நாத் சிங், பாஜக தேசியத் தலைவரும் மத்திய அமைச்சருமான ஜெ.பி.நட்டா உள்ளிட்ட மத்திய அமைச்சர்கள், முன்னாள் குடியரசுத் தலைவர் ராம்நாத் கோவிந்த், மக்களவைத் தலைவர் ஓம் பிர்லா, உச்சநீதிமன்றத் தலைமை நீதிபதி பி.ஆர். கவாய் ஆகியோர் பங்கேற்றனர்.

முன்னாள் குடியரசு துணைத் தலைவர் ஜகதீப் தன்கரும் பதவியேற்பு விழாவில் பங்கேற்றார். முன்னாள் குடியரசு துணைத் தலைவர்கள் வெங்கையா நாயுடு, ஹமீத் அன்சாரி உள்ளிட்டோரும் விழாவில் பங்கேற்றனர்.

மாநிலங்களவை எதிர்க்கட்சித் தலைவர் மல்லிகார்ஜுன கார்கே உள்பட பிற எதிர்க்கட்சித் தலைவர்களும், மகாராஷ்டிர முதல்வர் தேவேந்திர ஃபட்னவீஸ், மத்திய பிரதேச முதல்வர் மோகன் யாதவ், ஆந்திர பிரதேச முதல்வர் சந்திரபாபு நாயுடு ஆகியோரும் விழாவில் பங்கேற்றனர். மக்களவை எதிர்க்கட்சித் தலைவர் ராகுல் காந்தி பங்கேற்கவில்லை.